Ինչպե՞ս պահպանել գեղեցիկ կառուցվածքը. մոդել Լիլիթ Մարտիրոսյանի խորհուրդը

Երբ կինը կարծում է, թե ինքը թերություններ ունի, ոչ-ոք նրան հակառակը չի կարող համոզել: Իսկ երբ կնոջն իր մեջ ինչ-որ բան դուր չի գալիս, նա սկսում է բարդութավորվել եւ ստրեսների ենթարկվել: Դրան հաջորդում են անթիվ-անհամար դիետաները` տարբեր սննդկարգեր, որոնք պետք է օգնեն նրան նիհարել, սակայն այդ դիետաները ոչ բոլորի դեպքում են գործում միանշանակ:

Ինչպե՞ս առանց ավելորդ դիետաների եւ բարդացումների պահպանել գեղեցիկ կառուցվածքը: Բազմաթիվ կանանց հուզող հարցի պատասխանը ստանալու համար զրուցեցինք «Միսս Top Model Հայաստան» մրցույթի հաղթող, «Միսս Երկրագունդ» մրցույթի հայ մասնակից` մոդել Լիլիթ Մարտիրոսյանի հետ.

«Կանանց մոտ միշտ էլ կա ձգտում դեպի ավելի լավը, եւ դա հրաշալի է, երբ կինը չի դադարում ձգտել ավելի լավը եւ կատարյալ լինել: Ես ընդունում եմ այն բոլոր բնական միջոցները, որով հնարավոր է շտկել թերություններն ու դառնալ ավելի գեղեցիկ»,-ասում է Լիլիթը, որը չի ընդունում գեղեցիկ դառնալու բոլոր անբնական ճանապարհները.

«Օրինակ` կան դիետաների տեսակներ, որոնք սարսափելի են եւ վնասակար. Լավ է, երբ դիետան փոխարինվում է առողջ սնունդով եւ ամենօրյա մարզանքով»:

Լիլիթը երբեք չի դիմել որեւէ դիետայի օգնության. մոդելն ունի հատուկ սննդակարգ, որն իր իսկ խոսքով` դիետա չի կարելի անվանել.

«Ես շատ եմ սիրում դիմավորել արեւածագը, այնուհետեւ առավոտյան վազում եմ իմ սիրելի երգերի ներքո: Տուն վերադառնալիս մարզումներս արդեն շարունակում եմ տանը: Դրանից որոշ ժամանակ հետո ունենում եմ շատ հագեցած նախաճաշ, ինչը շատ կարեւոր է լավ ու աշխույժ օր սկսելու համար: Սիրում եմ համեղ սնվել` իմ սննդակարգից բացառելով թխվածքները, երշիկեղենը եւ պաղպաղակը: Ճաշում եմ ժամը 18:00-ին ու դրանից հետո աշխատում եմ ոչինչ չուտել` ոչ թե չգիրանալու, այլ լավ նյութափոխանակություն ունենալու համար: Երեկոյան կրկին կամ վազում եմ, կամ շատ երկար զբոսնում»:

Գեղեցկուհին խոստովանում է, որ եղել է ժամանակ, երբ ինքն էլ գոհ չի եղել իր կառուցվածքից.

«Հենց դա է լինում այն մոտիվացիան, որը ստիպում է քեզ տանջվել ու այնքան ջանք թափել, որ հասնես այն կետին, որ ինքդ զգաս` քեզ մոտ ամեն ինչ լավ է: Սակայն դրանից հետո էլ պետք չէ կանգ առնել. Պետք է ձգտել օր օրի դառնալ ավելի լավը»,-ասում է նա:

Հաճախակի շրջագայությունների ընթացքում Լիլիթը հասկացել է` հայ կանայք ամենագեղեցիկն են աշխարհում.

«Երբ վերադարձա հերթական մրցույթից, սկսեցի այլ կերպ նայել ամեն ինչին: Մեր կանայք ու աղջիկները շատ գեղեցիկ են. միայն թե կցանկանայի, որ մի քիչ մարզված լինեին: Ոչ մի խորհուրդ չեմ ուզում տալ մեր կանանց, պարզապես, իմ փորձով ուզում եմ փաստել, որ ինձ օգնում են բարությունը, հոգու եւ մարմնի ներդաշնակությունը, սպորտն ու ճիշտ սննդակարգը: Գեղեցիկ է այն կինը, որը երջանիկ է: Բոլոր կանանց մաղթում եմ, որ լինեն երջանիկ ու սիրված»:

Աղբյուրը` NEWS.am STYLE