Ջեյմս Ուորլիքը հաստատել է հունիսի վերջին ԼՂ հակամարտության հարցով հանդիպման անցկացումը

ԵԱՀԿ Մինսկի խմբի ամերիկացի համանախագահ Ջեյմս Ուորլիքը հաստատել է հունիսի վերջին Լեռնային Ղարաբաղի հակամարտության հարցով հանդիպման անցկացումը:

«Թեև մենք այս պահին հանդիպման մանրամասների մասին տեղեկություններ չունենք, սակայն կարող ենք հաստատել, որ հանդիպումը կկայանա հունիսի վերջին»,-Trend գործակալությանն ասել է Ուորլիքը:

Համանախագահը հույս է հայտնել, որ կողմերը կշարունակեն մայիսին ձեռք բերված պայմանավորվածությունների քննարկումը:

Հիշեցնենք, որ Ռուսաստանի Դաշնության արտգործնախարարությունը երեկ հրապարակել էր հաղորդագրություն, համաձայն որի Ղարաբաղյան հակամարտության կարգավորման հարցով Սանկտ Պետերբուրգում եռակողմ գագաթնաժողով է պատրաստվում: ՌԴ նախագահի խոսնակ Դմիտրի Պեսկովն այսօր չի բացառել Ռուսաստանի, Հայաստանի ու Ադրբեջանի ղեկավարների եռակողմ հանդիպումը Սանկտ Պետերբուրգում, այդ ուղղությամբ աշխատանքներ են տարվում, ասել է նա։

Հիշեցնենք նաև, որ Ռուսաստանի Դաշնության արտգործնախարար Սերգեյ Լավրովը, Միացյալ Նահանգների պետքարտուղար Ջոն Քերին և Ֆրանսիայի եվրոպական հարցերի պետքարտուղար Արլեմ Դեզիրը՝ ներկայացնելով ԵԱՀԿ Մինսկի խմբի համանախագահող երկրները, մայիսի 16-ին հանդիպել էին Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հետ՝ Լեռնային Ղարաբաղի հակամարտության խաղաղ կարգավորմանն աջակցելու նպատակով։

Ինչպես նշվել էր ԵԱՀԿ կայքում տեղադրված Սերգեյ Լավրովի, Ջոն Քերիի և Արլեմ Դեզիրի համատեղ հայտարարության մեջ. «Նախագահները վերահաստատել են հրադադարին և հակամարտության խաղաղ կարգավորմանն իրենց հանձնառությունը: Հետագա բռնությունների վտանգը նվազեցնելու համար նրանք համաձայնել են ամենակարճ ժամկետներում ավարտին հասցնել ԵԱՀԿ-ի հետաքննական մեխանիզմների ներդրման աշխատանքները: Նախագահները նաև համաձայնել են ԵԱՀԿ-ի գործող նախագահի անձնական ներկայացուցչի գրասենյակի ընդլայնմանը: Ի վերջո, նրանք համաձայնել են շարունակել անհետ կորածների վերաբերյալ տվյալների փոխանակությունը Կարմիր խաչի միջազգային կոմիտեի հովանու ներքո՝ հաշվի առնելով 2014 թվականի հոկտեմբերին Փարիզի գագաթնաժողովի ժամանակ ստանձնած պարտավորությունները»։