Թուրքիայի ԶՈւ եւ քրդերի միջեւ բախումները շարունակվում են. 2 սպանված զինծառայող, 4 վիրավոր

ՄԻՋԱԶԳԱՅԻՆ 11 Հունիս, 2016 13:42

Թուրքիայի արեւելյան եւ հարավարեւելյան քրդաբնակ շրջաններում զինված ուժերի եւ քրդերի միջեւ բախումները շարունակվում են:

Ինչպես հաղորդում է «Արմենպրես»-ը` վկայակոչելով «Անատոլու» լրատվական գործակալությունը, Հաքքարիի նահանգի Շեմդինլի քաղաքում զինվորականներ տեղափոխող ավտոբուսի վրա հարձակման հետեւանքով 2 զինծառայող սպանվել, 4-ն էլ վիրավորվել են:

Թուրքական կողմն անմիջապես հայտարարել է, որ հարձակումն իրագործել են Քուրդիստանի աշխատավորական կուսակցության (PKK) զինյալները, որոնք հարձակում են գործել նաեւ Շեմդինլիի Թեքելի ռազմաբազայի վրա: Վիրավոր զինծառայողները ուղղաթիռով հասցվել են հոսպիտալ:

Թուրքիաի ԶՈւ ստորաբաժանումմները օդուժի օժանդակությամբ ռազմական գործողություններ են իրականացնում քուրդ ազատամարտիկների դեմ:

Գերմանական Deutsche Welle ռադիոկայանը հայտնել է, որ Թուրքիայի հարավային եւ հարավարեւելյան քրդաբնակ շրջաններում անցյալ տարվա ամռանից սկսված թուրք-քրդական բախումների արդյունքում 335 հազար քրդեր փախստական են դարձել եւ հարկադրված հեռացել են իրենց տներից:

Թուրքական իշխանությունների պաշտոնական տվյալներով` անցյալ տարվա կեսից մինչ այժմ այդ բախումներում 338 քաղաքացիական անձ, այդ թվում` 78 երեխա կորցրել է կյանքը: Բախումների արդյունքում 6320 շենք եւ կառույց վնասվել են, որոնց վերականգման համար կպահանջվի 340 մլն դոլար:

Լուրջ վնաս կրած կառույցների մեջ 11 մզկիթներ եւ եկեղեցիներ կան: Քրդաբնակ տարածաշրջանի կենտրոն Դիարբեքիրում (Տիգրանակերտ) 500 տարուց բարձր տարիքի մզկիթ է ավերվել: Վնաս է հասցվել նաեւ Արեւելքի միակ մեծ քրիստոնեական` հայկական Սուրբ Կիրակոս եկեղեցուն: Քանդվել է նաեւ Տիգրանակերտի Հռոմեական դարաշարջանում կառուցված պատի մի հատվածը, որը պաշտպանվում է ՅՈՒՆԵՍԿՕ-ի կողմից:

Թուրքիայի մարդու իրավունքների կազմակերպությունը հայտարարել է, որ այդ բախումներում, որը շարունակվում է այսօր եւս, կոպտորեն խախտվել է 1 մլն 600 հազար մարդու իրավունքները:

Թուրքական կառավարության հրապարակած գնահատականներով, քրդերի հետ Թուրքիայի զինված ուժերի բախումների ընացքում անցյալ տարվա հուլիսից մինչ այժմ սպանվել է ուժային ստորաբաժանումների 500 աշխատակից, մոտ 5 հազար քուրդ զինյալ: