Թաիլանդում խստորեն սահմանափակել են ինքնաշեն հրթիռների ու «թռչող լապտերների» գործածումը

Թաիլանդի զինվորական իշխանությունները տոնական ինքնաշեն վառոդային հրթիռների ու «թռչող լապտերների» արտադրության ու թողարկման նկատմամբ հսկողության խիստ միջոցառումներ են ներդրել ՝ քաղավիացիայի թռիչքների անվտանգությունն ապահովելու նպատակով, ասվում է Թաիլանդի Royal Gazette թերթում հրապարակված հրամանում:

Հրամանի համապատասխան՝ ինքնաշեն հրթիռների ու ներսում այրվող ջահով թղթե թռչող լապտերների բոլոր գործածումները այսուհետ պետք է նախապես համաձայնեցվեն շրջանների աշխատակազմի հետ: Royal Gazette -ում հրապարակված հրամանը հաջորդ օրվանից ուժի մեջ է մտնելու:

Վառոդով լցված բամբուկե հրթիռների՝ «Բանգ ֆայի» արձակումը հին ավանդույթ է Թաիլանդի հյուսիս- արեւելքում ու Լաոսում: Հրթիռները արձակում են անձրեւների սեզոնի սկզբին, բնության ուժերին շնորհակալություն հայտնելու ու լավ բերք ապահովելու համար: Հրթիռների արձակման տոնը՝ «Բուն Բանգ Ֆայը» մրցույթ է, որին մասնակցում են մեկ շրջանի տասնյակ գյուղեր, յուրաքանչյուրն իր հրթիռով: Շահում է այն հրթիռը, որն ամենից երկար է թռնում:

«Թռչող լապտերները» Թաիլանդի հյուսիսային շրջանների ավանդույթներից է, որը կապակցված է աշնանը, անձրեւների սեզոնի վերջին նշվող «Լոյ Կրատխոնգ» տոնակատարության հետ: Օրվա մութ ժամերին հարյուրավոր ու հազարավոր լապտերներն են արձակվում: Համարվում է, որ թռչող լապտերը հեռացնում է վատ կարման ու միաժամանակ շահում տարերքների աստվածությունների բարեհաճությունը:

2015-ին «Լոյ Կրատխոնգ» տոնի ժամանակ թռչող լապտերների պատճառով հետաձգվել է 74 ավիաթռիչք, 30-ն էլ վայրէջք է կատարել պահուստային աէրոդրոմներում, հայտնում է «ՌԻԱ Նովոստին»: