Կանայք ճանաչվել են ԻՊ-ի ուժեղ կողմը

Մայամիի համալսարանի հետազոտողները հանգել են այն եզրակացության, որ կանայք կարեւոր դեր են կատարում «Իսլամական պետություն» կազմակերպության անդամների միջեւ կապեր ապահովելու տեսակետից, նաեւ նպաստում են սոցցանցերում քարոզչական նյութերի տարածմանը, հայտնում էLenta–ն:

Գիտնականները մարտահրավեր են նետել այն տարածված կարծրատիպին, թե կանայք աննշան դերակատարում ունեն ահաբեկչական կազմակերպություններում: Կանանց հաճախ դիտարկում են որպես քարոզչության ու ապատեղեկատվության զոհեր: Հենց դրա համար էլ ահաբեկչության դեմ պայքարի ավանդական ձեւերը հիմնականում ուղղված են արմատական կազմակերպությունների տղամարդ անդամների ոչնչացմանը:

Հետազոտողները վերլուծել են «ՎԿոնտակտե» սոցցանցի օգտատերերի միջեւ հաղորդակցության կառուցվածքը: Նրանք մի քանի պատճառներով են ընտրել այդ կայքը: Նախ այդտեղ ահաբեկչական խմբերին սատարող էջերը նույնքան արագ ու արդյունավետ չեն արգելափակվում, որքան Facebook–ում: Երկրորդ՝ «Վկոնտակտե»-ն Եվրոպայում խոշորագույն սոցցանց է՝ 360 մլն օգտատերերով: Երրորդ՝ դրանից օգտվողներից շատերը ապրում են ԻՊ վերահսկողության տակ գտնվող տարածքներում:

Սկզբում գիտնականները ընտրել էին հաճախակի հանդիպող առանցքային բառեր, որոնք կապակցված են ահաբեկչական կազմակերպությունների գործունեության հետ, օրինակ դրանց օգնությամբ որոշել են այն համայնքները, որտեղ ապրողները աջակցություն էին հայտնում ԻՊ-ին: Կիրառական ծրագրավորման ինտերֆեյսի օգնությամբ ահաբեկչական խմբավորումներին սատարող համայնքների ցանկը զգալիորեն ընդլայնվել է: Հետո գիտնականները վերլուծել են առանձին օգտատերերի միջեւ կապերը: Եթե երկու մարդ նույն համայնքի անդամ են եղել, ապա նրանք ներկայացվել են երկու կապակցված հանգույցների ձեւով: Վերջնական սխեման կազմված էր ավելի քան 41 հազար մարդուց (մոտ 25 հազար տղամարդ ու17 հազար կին) ու նրանց միջեւ մեկ միլիոն կապերից:

Վիճակագրական վերլուծության արդյունքները ցույց են տվել, որ կանայք՝ չնայած ԻՊ շարքերում իրենց համեմատական փոքր թվաքանակին, կարեւոր դեր են կատարում քարոզչական նյութերի տարածման՝ այդ թվում թեստերի, աուդիո ու վիդեո նյութերի տարածման հարցում: Նրանք նաեւ պահպանում են համայնքների միջեւ կապերը ու նպաստում, որ ահաբեկիչներին աջակցող համայնքները համալրվեն նոր մասնակիցներով: