«Ես գտել եմ իմ կեսին». Ռաֆայել Երանոսյան

Tert.am Youth-ը  գրում է.

Դերասան Ռաֆայել Երանոսյանը, ով միշտ աչքի է ընկնում բուռն ստեղծագործական կյանքով, վերջերս ակտիվ մասնակցություն է ունենում բազմաթիվ ներկայացումներում և նախագծերում: Այս առթիվ Tert.am Youth-ը զրուցեց դերասանի հետ` պարզելու համար, թե ինչ է սպասվում հեռուստադիտողին և ընթերցողներին:

  Ստեղծագործական  ի՞նչ փուլում եք: Նոր կերպարում, ե՞րբ  է  հանդիսատեսը  Ձեզ  տեսնելու:

 -Ստեղծագործական  բավականին ակտիվ  շրջանում եմ: Վերջերս, Կամերային թատրոնում «Ճերմակ  արագիլներ»  ներկայացման  պրեմիերան էր: Թատրոնում  նոր  փորձեր  ևս  արվում  են, սակայն  ներկայացումը  բեմում  կլինի  աշնանը: Հունիսի  յոթին  տեղի  ունեցավ նաև Նարեկ Դուրյանի՝  «Կնոջ  անունն է  Մորիս»  ներկայացման  պրեմիերան: Նարեկ  Օհանիչի   հետ  աշխատելը, դա  աննկարագրելի  ուրիշ  զգացողություն  էր: Հունիսի 16-ից  հյուրախաղերի  ենք  մեկնելու՝  եվրոպական  յոթ  քաղաք: Ֆիլմերի  նոր  առաջարկներ  էլ  ունեմ, սակայն  դրանք  կսկսեմ  օգոստոս  ամսից: Պարբերաբար  <<Stend>>  ակումբում էլ  փոքրիկ  սթենդափեր  եմ ունենում: Դերասանը  երբեք  ազատ  պետք  է  չմնա, քանի  որ  «ժանգոտելու» վախը  բոլորիս  է  սպառնում:

 

 Ռեժիսոր Արշո Հարությունյանի «Հայրերը» ռուսական բազմասերիանոց ֆիլմում նկարահանվող մի քանի հայ դերասաններից մեկն   էլ  Դուք  էիք: Չկա՞ն նոր  առաջարկներ:

 -Ռուսական սերիալը  դեռ  եթերում  չի  եղել, քանի  որ   մոնտաժային  աշխատանքներ  են  տարվում: Երկրորդ  նախագիծ  էլ  է  արվելու, սակայն իմ  մասնակցության մասին  դեռ հստակ  առաջարկ  ու  որոշում  չկա: Դեմ  չեմ  լինի, եթե  առաջարկեն:

 

 

Բավականին լուրջ  ներկայացումներից  հետո՝ «Քարե դարդ» սիթքոմ: Հաճելի է, թե՞ անհրաժեշտ:

 -Ես  ինչ  կեղտի մեջ  էլ, որ  մտնում եմ, ապա  դա   անում  եմ  հաճույքով: Բոլորս  էլ  աշխատում  ենք, որ  գումար  վաստակենք: Տարբերությունն այն  է, որ  փորձում  եմ ամեն  ինչ  անել՝  մնալով  արվեստի  կողքին: Այստեղ  մարմնավորել  եմ  բավականին հաջողված կերպար, որին  սիրել  են շատերը: Երեխաների  սիրելի կերպարն  եմ, իսկ դա  քիչ  չէ:

 

 Ի դեպ, չե՞ք  ուզում  ամուսնանալ:

 -Հիմա ինձ  թվում է, որ  պապաս  սկսեց  խոսել (ծիծաղում է): Տանը ամբողջ  օրը  այդ  խոսակցությունն է: Անգամ  փողոցում են ինձ  մոտենում  ու  նույն  հարցը  տալիս: Ճիշտն  ասած՝ շատ եմ  ուզում, սակայն  դրա  ժամանակն էլ կգա: Անձնական կյանքից  խոսել  չեմ սիրում: Չեմ կարծում, որ  մարդկանց  հետաքրքրում  է իմ անձնական կյանքը: Երբ  որոշեմ  ամուսնանալ, ապա  դա  բացառապես ինձ  է  վերաբերելու  և  հանրության  հետ  չեմ  կիսվելու: Անձնականս, կեսս միայն իմն է:

 Գտել  ե՞ք  կեսին:

 -Իմ կողքին  միշտ  կա, այն միակը ով իմ կողքին է: Ես  Նրան չեմ ուզում  հանրությանը  հրամցնել: Ես գտել եմ իմ կեսին, բայց Նրա մասին խոսելու   ժամանակը   դեռ նոր  է  գալու:)