Թուրքիան ՌԴ-ի հետ հարաբերությունները նորմալացնելու շողոքորթ ժեստեր է անում Մոսկվային

 Թուրքիայի նախագահ Ռեջեբ Թայիփ Էրդողանն իր ռուսաստանցի գործընկեր Վլադիմիր Պուտինին ուշացումով հղած նամակում շնորհավորել է անցած «Ռուսաստանի օրվա» կապակցությամբ եւ ցանկացել, որպեսզի Մոսկվայի եւ Անկարայի միջեւ հարաբերությունները դուրս գան «արժանի մակարդակի»:

Վկայակոչելով «ՌԻԱ Նովոստի» գործակալությունը, Թուրքիայի վարչապետ Բինալի Յըլդըրըմը եւս ռուսաստանյան կառավարության ղեկավար Դմիտրի Մեդվեդեւին հղած նամակում հույս է հայտնել այն բանի համար, որպեսզի առաջիկայում երկու երկրների միջեւ համագործակցությունն ու հարաբերությունները «հասնեն երկու ժողովուրդների ընդհանուր շահերի համար անհրաժեշտ մակարդակի»:

Թուրքական եւ ադրբեջանական ԶԼՄ-ները համառորեն լուրեր են շրջանառում այն մասին, որ Թուրքիայի ղեկավարները Բելառուսի եւ Ադրբեջանի նախագահներին «խնդրել» են միջնորդական գործունեություն ծավալել Թուրքիայի նկատմամբ ՌԴ-ի ղեկավարների կոշտ դիրքորոշումը մեղմացնելու ուղղությամբ` Թուրքիայի եւ Ռուսաստանի միջեւ հարաբերությունները նորմալ հուն վերադարձնելու նպատակով:

ՌԴ-ի եւ Թուրքիայի միջեւ հարաբերությունները հայտնվել են ճգնաժամում այն բանից հետո, երբ 2015 թվականի նոյեմբերի 24-ին թուրքական F-16 կործանիչը Սիրիայում խոցել է ռուսաստանյան Սու-24 ռմբակոծիչին: ՌԴ նախագահ Վլադիմիր Պուտինը դա անվանել է ահաբեկիչների հանցակիցների կողմից «հարված թիկունքից»: Միջադեպից հետո ՌԴ նախագահը հրամանագիր է ստորագրել ազգային անվտանգության ապահովման գծով միջոցառումների եւ Թուրքիայի նկատմամբ հատուկ տնտեսական միջոցառումների մասին:

Ռուսատանի ղեկավարները հայտարարել են, որ թուրք-ռուսասկան հարաբերությունները վերականգնելու մասին հնարավոր կլինի խոսել միայն այն բանից հետո, եթե Թուրքիայի ներկայիս ղեկավարությունը պաշտոնապես ներողություն խնդրի Մոսկվայից եւ փոխհատուցի խոցված ռուսաստանյան ինքնաթիռի եւ ուղղաթիռի անձնակազմերի ընտանիքներին:

Ըստ Ռուսաստանյան ԶԼՄ-ների` Մոսկվայի կողմից 2016 թվականի հունվարի 1-ից Թուրքիայի դեմ իրականացվող պատժամիջոցների արդյունքում Թուրքիան մոտ 10 մլրդ դոլարի վնաս կկրի: