Օբաման եւ Օլանդը միմյանց ցավակցել են Օռլանդոյում եւ Փարիզում կատարված հարձակումների կապակցությամբ

Ֆրանսիայի նախագահ Ֆրանսուա Օլանդը հունիսի 14-ին ԱՄՆ-ի նախագահ Բարաք Օբամայի հետ կայացած հեռախոսազրույցի ընթացքում ցավակցություն է հայտնել ԱՄՆ-ի Ֆլորիդայի նահանգի Օռլանդո քաղաքում մարդկանց զանգվածային սպանության կապակցությամբ: Այդ մասին հայտնել է Սպիտակ տան մամուլի ծառայությունը:

Իր հերթին Օբաման «ամերիկյան ժողովրդի անունից  ցավակցություն է հայտնել ֆրանսիացի ոստիկանի եւ նրա ընկերուհու վրա կատարված հարձակման կապակցությամբ»:

Երկու ղեկավարները հավաստել են իրենց փոխադարձ հանձնառությունը՝ թուլացնելու եւ ոչնչացնելու ԴԱԻՇ-ին, ինչպես նաեւ շարունակելու համագործակցությունը ահաբեկչության դեմ մղվող պայքարում, ճշտել են Սպիտակ տանը:

Florida Pulse ակումբի վրա հարձակումը կատարվել է հունիսի 12-ին: Աֆղանական ծագումով 29-ամյա ամերիկացի Օմար Մատինն սպանել է 49 մարդու: Ակումբի 53 այցելուներ վերքեր են ստացել, նրանցից հինգը ծանր վիճակում են: Սպանդը ամենաարյունալին է համարվում ԱՄՆ-ի նորագույն պատմության մեջ:

Ըստ ԶԼՄ-ների հաղորդումների՝ Մատինը հավատարմության երդում է տվել «Իսլամական պետություն» ահաբեկչական խմբավորմանը: Նա սպանվել է ոստիկանության կողմից:

Հունիսի լույս 14-ի գիշերը 25-ամյա Աբալա Լարոսին Փարիզի մերձակայքում հարձակվել Է իր հարեւան ոստիկանի վրա ու սպանել նրան՝ դանակի մի քանի հարված հասցնելով որովայնի շրջանում: Դրանից հետո նա պատանդ Է վերցրել նրա կնոջն ու երեխային: Չարագործը ոչնչացվել Է ոստիկանության հատուկ նշանակության ուժերի գործողության ընթացքում: Հարձակման վայրում գտել են ոստիկանի տիկնոջ մարմինը, որը հանցագործի կողմից սպանվել Է սառը զենքով: Նա նույնպես աշխատում Էր ՆԳ նախարարության կառույցում: Տանը գտնվող երեխան՝ երեք տարեկան տղան, չի տուժել, հաղորդել Է ՏԱՍՍ-ը: