ԱԺ արտահերթ նիստ. սպասվում են կարևոր քվեարկություններ

Ազգային ժողովում մեկնարկել է կառավարության հրավիրած արտահերթ նստաշրջանի հերթական նիստը: Նիստի մեկնարկին քվեարկության կդրվեն նախորդ օրը քննարկված հարցերը:

Հունիսի 16-ի նիստում պատգամավորները քննարկել են Հայաստանի Հանրապետության եւ Վերակառուցման եւ զարգացման եվրոպական բանկի միջեւ 2016 թվականի մայիսի 11-ին ստորագրված «Գյումրու քաղաքային ճանապարհներ» վարկային համաձայնագիրը:  Վերակառուցման եւ զարգացման եվրոպական բանկը 15 տարի ժամկետով Հայաստանին կտրամադրի 14.6 մլն ԱՄՆ դոլար գումարի չափով վարկ` Գյումրի քաղաքում ունենալու անվտանգ երթեւեկության կազմակերպման համար բարեկարգ փողոցներ եւ էներգախնայող արտաքին լուսավորության ցանց:

ՀՀ արդարադատության նախարարի տեղակալ Արսեն Մկրտչյանը երկրորդ ընթերցմամբ քննարկման է ներկայացրել «Սնանկության մասին» ՀՀ օրենքում փոփոխություններ եւ լրացումներ կատարելու մասին» եւ կից օրենսդրական փաթեթը, որը լրացվել է երեք ընդունված առաջարկով: Երկրորդ ընթերցմամբ խորհրդարանը քննարկել է նաեւ «Անձնական տվյալների պաշտպանության մասին» ՀՀ օրենքում լրացում կատարելու մասին» օրենքի նախագիծը: Երկրորդ ընթերմամբ քննարկվել է նաեւ «Վարչատարածքային բաժանման մասին» ՀՀ օրենքում լրացում կատարելու մասին» օրենքի նախագիծը : Հիմնական զեկուցող Վաչե Տերտերյանը ներկայացրել է, որ հաշվի են առնվել պատգամավորների եւ համայնքների առաջարկները. ըստ այդմ՝ Զորական համայնքը կհանվի Այրումի «փնջից» եւ Կողբի համայնքի հետ կդառնա մեկ «փունջ», իսկ Բերդավան համայնքը կընդգրկվի Նոյեմբերյանի «փնջում»:

ՀՀ էներգետիկայի եւ բնական պաշարների փոխնախարար Արեգ Գալստյանը պատգամավորների քննարկմանն է ներկայացրել «Հայաստանի Հանրապետության եւ Վերակառուցման եւ զարգացման միջազգային բանկի միջեւ 2016 թվականի մայիսի 12-ին ստորագրված՝ «Էներգետիկայի ոլորտի ֆինանսական առողջացման ծրագիր» վարկային համաձայնագիրը, որով նախատեսվում է 25 տարի մարման ժամկետով Հայաստանին տրամադրել 30 մլն ԱՄՆ դոլար գումարի չափով վարկ: Ակնկալվում է, որ ծրագրով նախատեսված միջոցառումները կայուն ազդեցություն կունենան էլեկտրաէներգետիկական ոլորտի պետական արտադրող ընկե րությունների, «ՀրազդանՋԷԿ» ԲԲԸ-ի եւ «Հայաստանի էլեկտրական ցանցեր» ՓԲԸ-ի ֆինանսական վիճակի վրա:

Քննարկվել է 2015 թվականի մայիսի 29-ին ստորագրված «Եվրասիական տնտեսական միության եւ դրա անդամ պետությունների՝ մի կողմից, եւ Վիետնամի Սոցիալիստական Հանրապետության` մյուս կողմից, միջեւ ազատ առեւտրի մասին» համաձայնագիրը: Հիմնական զեկուցող, ՀՀ էկոնոմիկայի նախարարի առաջին տեղակալ Գարեգին Մելքոնյանը տեղեկացրել է, որ փաստաթղթով նախատեսվում է կողմերի միջեւ փոխադարձ առեւտրում մաքսատուրքի դրույքաչափերի նվազեցում: Մասնավորապես, համաձայնագրի ուժի մեջ մտնելուց անմիջապես հետո, որոշ ապրանքների հանդեպ նախատեսվում է կիրառել 0 տոկոս մաքսատուր ք: Հարցի քննարկումը կշարունակվի հունիսի 17-ի նիստում:

ՀՀ էկոնոմիկայի նախարարի տեղակալ Գարեգին Մելքոնյանը քննարկման է ներկայացրել 2012 թվականի նոյեմբերի 7-ին Բաղդադում ստորագրված «Հայաստանի Հանրապետության կառավարության եւ Իրաքի Հանրապետության կառավարության միջեւ ներդրումների խրախուսման եւ փոխադարձ պաշտպանության մասին» համաձայնագիրը: Հիմնական զեկուցողը նշել է, որ համաձայնագիրը հնարավորություն է ընձեռում հավասարության եւ փոխշահավետության հիման վրա երկու երկրների ներդրողների համար ստեղծել բարենպաստ պայմաններ՝ նպաստելով երկու երկրներում գործարար նախաձեռնությունների խթանմանÕ ¨: Հարցի քննարկումը կշարունակվի հունիսի 17-ի նիստում: