Սիրիայի և Իրաքի հայկական համայնքներում իրավիճակի դրական տեղաշարժ չի եղել

Սիրիայի և Իրաքի հայկական համայնքներում իրավիճակի դրական տեղաշարժ չի եղել: Այս մասին նշվեց Սիրիահայերի հիմնախնդիրները համակարգող միջգերատեսչական հանձնաժողովի հերթական նիստին, որն անցկացվեց ՀՀ սփյուռքի նախարար Հրանուշ Հակոբյանի գլխավորությամբ: Նախարարի խոսքով` սիրիահայերի ` Հայաստան ժամանման առաջին իսկ օրից սկսվել էր նրանց մշակութային, կրթական և առողջապահական ինտեգրումը, որը կարելի է համարել ավարտված, սակայն դեռ կան տնտեսական խնդիրներ: Փորձ է արվում ներգրավել միջազգային կառույցներ և կազմակերպություններ, որպեսզի նրանք ևս աջակցություն ցուցաբերեն այս խնդիրների լուծմանը: «Շատերն ի սկզբանե ժամանել էին Հայաստան՝ հետագայում վերադառնալու հույսով, սակայն ժամանակի ընթացքում հասկացան, որ վերադարձի ճամփան խիստ դժվար է լինելու, ուստի սկսեցին ներգրավվել Հայաստանի սոցիալ- տնտեսակաÕ ¶ կյանքում»,- «Արմենպրես»-ի փոխանցմամբ՝ նշեց Հակոբյանը:

ՀՀ արտաքին գործերի նախարարության Մերձավոր և Միջին Արևելքի վարչության պետ Սարմեն ԲաղդասարյանըՍիրիայում և Իրաքում տիրող իրավիճակի և հայ համայնքի խնդիրների մասին զեկույցը ներկայացնելիս նշեց, որ այնտեղ վերջին ամիսների ընթացքում դրական տեղաշարժ չի արձանագրվել: Ռազմական գործողություններ իրականացնողներն ու նրանց աջակցողները չեն պատրաստվում զիջումների գնալ, իսկ միջազգային հանրության միջնորդական ջանքերն առայժմ անարդյունավետ են:

Ըստ Սիրիայում հայկական դիվանագիտական ներկայացուցչության տվյալների՝ այդ երկրում հայ բնակչության թիվը տատանվում է 17-20 հազարի սահմաններում:

Սիրիայի 1/3-ից ավելին ընդդիմադիր ուժերի և ահաբեկիչների ձեռքում է: ՄԱԿ-ի տվայլներով՝ մինչև պատերազմը Սիրիայում ապրում էր 25 մլն մարդ, իսկ ներկա պահին՝ 17-18 մլն: Կա առնվազն 7 մլն ներքին տեղանաված, 5 մլն գաղթական՝ գրանցված ՄԱԿ-ի փախստականների գլխավոր հանձնակատարի կողմից: Առնվազն 5 մլն մարդ ունի մարդասիրական օգնության կարիք:

Երկիրը պատերազմի տարիներին կրել է առնվազն 250 մլն դոլարի վնաս. գործազրկությունը մոտենում է 70 տոկոսի, աղքատության շեմը գերազանցում է 70 տոկոսը:     

««Իսլամական պետության» գործողությունների արդյունքում իրաքահայ համայնքի կենտրոնացում է նկատվում Բաղդադ և Էրբիլ քաղաքներում: Ստեղծված իրավիճակում տենսում ենք, որ երկիրը լքելու գաղափարն արմատավորվում է»,- ընդգծեց Սարմեն Բաղդասարյանը: Իրաքահայության թիվն, ըստ առաքելական եկեղեցու առաջնորդարանի, չի գերազանցում 7500-ը, որից 4000-ը բնակվում է Բաղդադում, 3200-ը՝ Էրբիլում, իսկ հայկական Կաթողիկե համայնքը հաշվվում է շուրջ 250 ընտանիք, որ գերազանցապես արաբախոս են: «Ամենածանր վիճակում Բասրայի համայնքն է, որ փաստացի, կարելի է ասել՝ գոյութուն չունի»,- հավելեց նա:

Սարմեն Բաղդասարյանը նաև տեղեկացրեց, որ անկախ այս ծանր պայմաններից՝ իրաքահայությունը 2 օր առաջ դրամահավաք է կազմակերպել Ղարաբաղի օգնության ֆոնդի համար. արդյունքում հավաքվել է 50 հազար դոլար:

Գերմանիայի միջազգային համագործակցության ընկերության (GIZ) «Սիրիացի փախստականների տնտեսական ինտեգրումը Հայաստանում» ծրագրի ղեկավար Հանս Յոհաքիմ Զինկանը զեկուցեց «Տնտեսական հնարավորությունների շաբաթ» գործարար համաժողովի արդյունքները: Սիրիահայերի գործարարության զարգացման ծրագրերը ներկայացրեց Հայաստանի Փոքր և միջին ձեռնարկատիրության զարգացման ազգային կենտրոնի գործադիր տնօրենի տեղակալ Կարեն Գևորգյանը: 2015 և 2016 թթ. նախատեսվող ծրագրերի մասին խոսեց Հայկական կարմիր Խաչի ընկերության ներկայացուցիչը: