«Եվրո 2016». Իտալիայի հավաքականը նվազագույն հաշվով հաղթեց Շվեդիային

 «Եվրո 2016»-ում տեղի ունեցավ E խմբի առաջատար Իտալիայի և Սկանդինավները ներկայացնող Շվեդիայի մրցավեճը:«Արմենպրես»-ը հաղորդում է,  որ Իտալիա-Շվեդիա հանդիպումն ավարտ վեց 1-0 հաշվով հօգուտ Իտալիայի:

Թիմերը խաղադաշտ էին դուրս եկել հետևյալ մեկնարկային կազմերով.

Իտալիա. Բուֆոն, Կյելինի, Կանդրևա, Բոնուչի, Բարձալի, Ֆլորենցի, Պարոլո, Դե Ռոսսի, Ջակերինի, Էդեր, Պելե

Շվեդիա. Իսակսոն, Յոհանսոն, Գրանքվիսթ, Օլսոն, Լինդելոֆ, Ֆորսբերգ, Ս. Լարսոն, Էկդալ, Չելստրյոմ, Գյուիդետի, Իբրահիմովիչ

Գլխավոր մրցավար` Վիկտոր Կաշայի: 

 

Երկու թիմերի միջև ավարտված 1-ին կեսը չարդարացրեց ֆուտբոլասերների սպասելիքները: Իտալիայի հավաքականը, վստահ հաղթելով Բելգիային, թվում էր այս խաղում խնդիրներ չի ունենա Շվեդիայի հավաքականի հետ, և արդեն առաջին կեսում կկարողանա լուծել բոլոր հարցերը: Իսկ Շվեդիան պատրաստվել էր գրագետ և կայուն պաշտպանության: 1-ին վտանգավոր գրոհը կազմակերպեցին Իտալիայի հավաքականի խաղացողները: Անտոնիա Կանդրևայի փոխանցումից հետո, եթե չլիներ շվեդ պաշտպան Օլսոնը` Գրացիանո Պելեն կբացեր խաղի հաշիվը: Շվեդիան փրկվեց վտանգավոր պահից: Էրիկ Համրենի հավաքականի քիչ թե շատ վտանգավոր գրոհը տեսանք 28-րդ րոպեին: Զլատան Իբրահիմովիչի գլխով հարվածը մի փոքր բարձր ստացվեց: Առաջին կեսը թիմերն ավարտեցին մեկական կիսագրոհով, որից հետո կրկին հաշիվը չփոխվեց: Շվեդիան կատարեց 1-ին կեսի իր ամենագլխավոր խնդիրը` Իտալիային թույլ չտվեց արագորեն կտրվել հաշվի մեջ:

2-րդ կեսում Իտալիան խաղադաշտ դուրս եկավ լի վճռականությամբ փոխել իրավիճակը խաղադաշտում: Այնուամենայնիվ, առաջին վտանգավոր հարվածը եղավ միայն 64-րդ րոպեին, երբ Անտոնիո Կանդրևայի գրեթե սուր անկյունից կատարած հարվածը փակեց շվեդ դարպասապահ Իսակսոնը: Շվեդիան պատասխանեց Զլատան Իբրահիմովիչի 72-րդ րոպեի վտանգավոր գրոհով: Իբրան չկարողացավ ազատ դարպասը 2 մետրից գրավել, իսկ մրցավարն ակնթարթ հետո համարեց, որ Զլատանը խաղից դուրս վիճակում էր: Իտալիայի պատասխան գրոհն ավելի քան վտանգավոր ստացվեց: 82-րդ րոպեին Մարկո Պարոլոյի հարվածից հետո դարպասաձողը հաշքով փրկեց Շվեդիային: Իտալիան իր բարձր կարգը ցույց տվեց 88-րդ րոպեին: Էդերը, ստանալով գնդակը, անցավ շվեդ մի քանի պաշտպանների և հիանալի հարվածով գրավեց Իսակսոնի դարպասը: Շվեդիան առաջ նետվեց կորցածը ետ բերելու և բաց թողեց արագ հակագրոհը:  Կանդրևայի հարվածից հետո Իսակսոնը դժվարությամբ հեռացրեց գնդակը: Հանդիպումը այդպես էլ ավարտվեց. Իտալիան տարավ 2-րդ հաղթանակը և 6 միավորով գլխավորում է իր խմբի աղյուսակը: