Ի՞նչն է կրկին համախմբել Միշոյին, DJ Սերժոյին, Ռոլանդ Գասպարյանին, Ֆելիքս Խաչատրյանին ու A.Chilla-ին

«Մի քանի հոգի» նախագիծի անդամները՝ Միշոն, DJ Սերժոն, Ռոլանդ Գասպարյանը, Ֆելիքս Խաչատրյանն ու A.Chilla-ն, որոշակի դադարից հետո կրկին համախմբվել են, իսկ այս անգամ նրանց համախմբման պատճառ է դարձել համատեղ՝ թվով երկրորդ ալբոմը:

Life.panorama.am-ի հետ զրույցում այս մասին պատմեց DJ Սերժոն: Վերջինս նկատեց, որ իրենց նախագիծն ի սկզբանե անընդհատ ակտիվ գործունեության նպատակ չի ունեցել, քանի որ ընդգրկված անդամներից ամեն մեկը նաեւ առանձին է գործում.

«Իրականում հենց սկզբից էլ չենք պլանավորել, որ «Մի քանի հոգին» շատ ակտիվ է գործելու, չէ որ հինգ տարբեր մարդիկ զբաղվում են համապատասխան հինգ տարբեր գործունեությամբ ու ամեն մեկն ունի իր աշխատանքն ու զբաղվածությունը, ինչը երբեմն խնդիր է հանդիսանում մեկ տեղում հավաքվելու եւ մեկ աշխատանքի վրա կենտրոնանալու համար: Առաջին ձայնասկավառակից հետո երկար ժամանակ է անցել, բայց ուրախ ենք, որ երկրորդ ձայնասկավառկի պահանջարկը իսկապես ուներ մեր հանդիսատեսը, ուստի կարողացանք ձեռնամուխ լինել ու կյանքի կոչել նաեւ երկրորդ ձայնասկավառակը»,- նշեց Սերժոն ու շարունակեց.

«Դեռ վաղուց կային մտքեր, գրված երաժշտություններ, համապատասխան խոսքեր, որոնք սպասում էին ճիշտ պահի ներկայացվելուն: Հիմա բոլորս մեր ողջ ուժերն ենք կենրտոնացրել այս գործի վրա, որը շուտով կկարողանանք հանձնել մեր երաժշտությունը նախընտրողների դատին. մեր համատեղ ալբոմը պատրաստ կլինի մինչ ամռան կեսը»:

Սերժոն հրաժարվեց առավել մանրամասներ հայտնել ձայներիզի մասին՝ նշելով, որ անակնկալների պակաս հաստատ չի լինի: Ձայներիզում տեղ կգտնեն «Մի քանի հոգի» նախագծի անդամների եւ այլ արտիստների հետ համատեղ զուգերգեր: Իսկ արդեն ձայներիզի լույս տեսնելուն կհաջորդեն մի քանի տեսահոլովակներ, որոնք կնկարահնվեն ալբոմում տեղ գտած երգերից մի քանիսի հիման վրա:

Հեղինակ՝ Անուշիկ Մելքոնյան