Ադրբեջանի արտաքին առեւտրային շրջանառությունը 32 տոկոսով նվազել է

2016 թվականի վերջին 5 ամիսներին, անցյալ տարվա նույն ժամանակաշրջանի համեմատ, Ադրբեջանի արտաքին առեւտրային շրջանառությունը 32 տոկոսով նվազել է:

Այս մասին հայտնում է «Թուրան» լրատվական գործակալությունը` հղում կատարելով Ադրբեջանի պետական վիճակագրական ծառայությանը:

Նշվում է, որ արտահանման գործողությունների նվազելու պատճառով արտաքին առեւտրի հաշվեկշռում 281,4 մլն դոլար ծավալով բացասական մնացորդ է ստեղծվել: Միայն մայիսին Ադրբեջանում ներկրումը 137,2 մլն դոլարով ավելի է եղել  արտահանումից:

Վերջին 5 ամիսներին, անցյալ տարվա նույն ժամանակաշրջանի համեմատ, 42,2 տոկոսով պակաս ապրանքներ են արտահանվել Ադրբեջանից: Արտահանման մեջ նավթի եւ գազի մասնաբաժինը կազմել է 84,7 տոկոս:

«Թուրան»-ի հաշվարկներով` ոչ նավթագազային ապրանքների արտահանումը 2016 թվականի վերջին 5 ամիսներին 278,8 մլն դոլարով նվազել է:

Ադրբեջանի արտաքին առեւտրային շրջանառությունը 2015 թվականին նվազել էր 58 տոկոսով:

2016 թվականի հունվար-ապրիլ ամիսներին Ադրբեջանի տնտեսության մեջ հետընթաց է տեղի ունեցել:

Fins.az լրատվական կայքը` հղում կատարելով Ադրբեջանի պետական վիճակագրության կոմիտեի հայտնած տեղեկատվությանը, ավելի վաղ հայտնել էր, որ ընթացիկ տարվա առաջին 5 ամիսներին երկրում գործող ձեռնարկությունների, ընկերությունների եւ տարբեր ձեռնարկատերերի կողմից 21 512,8 մլն մանաթի կամ էլ, նախորդ տարվա նույն ժամանակաշրջանի համեմատ, 4,2 տոկոս պակաս ներքին համախառն արտադրանք (ՀՆԱ) է արտադրվել:

Հիշյալ ժամանակաշրջանում Ադրբեջանում նավթի արտադրությունը նվազել է 0,7 տոկոսով, բնական գազի արտադրությունը` 9,9 տոկոսով, էլեկտրաէներգիայի արտադրությունը` 6,8 տոկոսով: Կրճատվել է նաեւ վերամշակող արդյունաբերության որոշ ապրանքների արտադրությունը:

Հաշվետու ժամանակահատվածում արդյունաբերական արտադրության կառուցվածքում արդյունահանող արդյունաբերության տեսակարար կշիռը կազմել է 64,5 տոկոս, վերամշակող հատվածինը` 28,6 տոկոս, էլեկտրաէներգիայի, գազի եւ գոլորշու արտադրության, բախշման եւ մատակարարմանը` 6,1 տոկոսով եւ այլն:

Ադրբեջանի Պետվիճկոմի հաշվարկներով` 2016 թվականի հունվար-մայիսին կաշվի, կոշիկի արտադրությունը 73,6 տոկոսով կրճատվել է, թղթի եւ ստվարաթղթինը` 6 տոկոսով, պոլիգրաֆիական ապրանքներինը` 7,5 տոկոսով, քիմիական արտադրանքինը` 18,8 տոկոսով, ռետինային եւ պլաստիկ արտադրանքինը` 22,6 տոկոսով, մետաղագործական արտադրանքինը` 9,4 տոկոսով, կահույքինը` 8,3 տոկոսով եւ այլն:

Նշվում է նաեւ, որ «Ազերի-Չիրաղ-Գյունեշլի» գլխավոր նավթահորերի համալիրից արդյունահանվող նավթի վաճառքից Ադրբեջանի պետական նավթային հիմնադրամի մուտքերը 2016 թվականի հունվար-մայիսին, անցյալ տարվա նույն ժամանակաշրջանի համեմատ, 30,3 տոկոսով նվազել են:

Նավթի համաշխարհային գներն անցյալ տարվանից մոտ երկու անգամից ավելի ընկնելու, արդյունահանման ծավալների նվազելու հետեւանքով գլխավորապես էներգակիրների արտահանումից կախված Ադրբեջանի տնտեսությունը հայտնվել է խոր ճգնաժամում:

The Financial Times թերթը գրում է, որ Ադրբեջանի արտահանման 95 տոկոսից ավելին կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին: