Տարածաշրջանի երկրները պետք է ուժերը կենտրոնացնեն Թուրքիայի ազդեցությունը նվազեցնելու համար. Վաղարշակ Հարությունյան

ՀՀ պաշտպանության նախկին նախարար Վաղարշակ Հարությունյանը կարծում է, որ տարածաշրջանում կայունության ապահովումը անմիջականորեն կախված է Ռուսաստանից:

«Պատմականորեն տարածաշրջանը միշտ հանգիստ է եղել այն ժամանակ, երբ այնտեղ էր ռուսական կայսրությունը կամ օրինակ Խորհրդային միությունը: Հենց Ռուսաստանը հեռացավ կամ ԽՍՀՄ փլուզվեց, դա հանգեցրեց այս վիճակին:  Ես կասկածում եմ, որ եթե այսպես շարունակվի, մոտակա ժամանակներում այստեղ կտիրի խաղաղություն, նման  հեռանկարներ չկան:  Միակ հեռանկարը միասնական ինչ-որ կառույցի առկայությունն է, որում կընդգրկվեին տարածաշրջանի երկրները, սակայն այսօր ես դա քիչ հավանական են համարում»,-«Արմենպրես»-ի հաղորդմամբ՝ լրագրողների հետ զրույցում նշեց պաշտպանության նախկին նախարարը:

Նրա խոսքով՝ այժմ տարածաշրջանի երկրները պետք է միասնական ուժերը կենտրոնացնեն Թուրքիայի ազդեցությունը նվազեցնելու ուղղությամբ:

«Եթե Թուրքիան տարածաշրջանում է, այստեղ երբեք խաղաղություն չի լինի: Այն ոչ միայն տարածաշրջանի, այլեւ Մերձավոր Արեւելքի համար  «երկիր-տերմինատոր է»՝ չտալով ոչինչ տնտեսության եւ մշակույթի ոլորտներում, սակայն բերելով այս պետությունները քայքայման: Սա թերեւս որպես աշխարհաքաղաքական գլխավոր խնդիր եմ տեսնում: Բոլոր պետությունները, որոնք հասկանում են սա, այս հարցում պետք է գործեն միասնական կերպով:  Սա բարդ հարց է, սակայն ըստ իս՝ սա է ճիշտ ճանապարհը»,-ընդգծեց Վաղարշակ Հարությունյանը: