Սեփական բնակարան ունենալու մոտ 500 երիտասարդ մասնագետների երազանքն իրագործված է

Երևանի Ավան վարչական համալիրում մի շարք մասնագիտությունների տեր անձինք բնակարանամուտ տոնեցին: Այն հնարավոր է դարձել «Մատչելի բնակարան երիտասարդ մասնագետներին» բնակարանային ապահովության ծրագրի շրջանակներում: 

Այս ծրագրի շրջանակներում բնակարան ձեռք բերելու հնարավորություն է ստացել 490 շահառու: ՀՀ Նախագահը հունիսի 28-ին ներկա գտնվեց բազմաբնակարան շենքային համալիրի բացման հանդիսավոր արարողությանը:

Բնակարանաշինական ծրագրի ընդհանուր արժեքը շուրջ 10.8 միլիարդ դրամ է: Ծրագրի իրականացման աշխատանքներում ներգրավվել է 700 աշխատող:

Բնակարանները շուկայականից ցածր գներով են տրվել թիրախային խմբերին: Բազմաբնակարան-բազմաֆունկցիոնալ շենքերը 7-ն են, դրանք մոնոպոլիտ երկաթբետոնյա են՝ տուֆի և բազալտի արտաքին երեսպատմամբ, ունեն 14 բնակելի հարկեր, 112 ավոմեքենայի կայանման համար նախատեսված ստորգետնյա ավտոկայանատեղեր, ժամանակակից արտաքին լուսավորություն: Բնակիչների համար շեքների բակում կառուցվել է առևտրի և սպասարկման կենտրոն: Բնակարանների 85 տոկոսը շահառուներին հանձնվել է ամբողջությամբ վերանորոգված վիճակում:

ՀՀ սպորտի և երիտասարդության հարցերի նախարարի տեղակալ Արսեն Քարամյանի խոսքով՝ ծրագրի իրականացմամբ ոչ միայն մատչելի պայմաններով բնակարաններ են ձեռք բերել երիտասարդ մասնագետները, այլև կառուցման 3 տարիներին աշխատանքով է ապահովվել 700 մարդ: Փոխնախարարը հիշեցրեց, որ ծրագիրը կդադարի գործել 2018-ին՝ ամփոփելով շուրջ 10 տարվա արդյունքները: «2018-ի մարտ-ապրիլ-մայիս ամիսներին ավարտելու ենք այս ծրագիրը: Ամփոփելու ենք վերջին տասը տարիներին կատարած աշխատանքը, որը ՀՀ Նախագահի բարձր հովանու ներքո էր իրականացվում»,-նշեց պաշտոնյան:

Շահագործման հանձնված շենքերից մի քանիսում ներդրվել են էլեկտրաէներգիայի առևտրային հաշվառման ավտոմատ համակարգեր, որոնք բաժանորդներին թույլ կտան առցանց տարբերակով տեղեկանալ իրենց հաշվիչների ցուցմունքներին:

«Հայաստանի էլեկտրական ցանցեր» ընկերության էլեկտրաէներգիայի առևտրային հաշվառման ավտոմատ համակարգերի վարչության պետ Միքայել Կուդոյանը լրագրողներին ներկայացրեց այս համակարգի առավելությունն ու կիրառման ընթացակարգը:

«Բաժանորդը ստանում է մուտքանուն և գաղտնաբառ, որից հետո հասարակ ընթացակարգով մուտք են գործում համակարգի մեջ և օնլայն ռեժիմով տեղեկանում իրենց հաշվիչի ցուցմունքներին: Բաժանորդն իր տանը նստած կարող է տեսնել իր ծախսը մեկ ժամ, մեկ օր առաջ: Եթե լինեն միջամտություններ, նրանք անմիջապես կտեսնեն: Այսուհետ այս բաժանորդները շատ քիչ են կախված լինելու այսպես կոչված «լույսի մարդուց»,-հայտնեց Միքայել Կուդոյանը՝ հավելելով, որ սա բնակիչների համար լրացուցիչ ծախս չի առաջացրել:

Համազգային թատրոնի տնօրեն Վարդան Մկրտչյանի երիտասարդ ընտանիքի համար օրը կրկնակի տոնական էր. ամուսնության երկրորդ տարեդարձ և բնակարանամուտ: Սրան ավելացավ նաև այն, որ նրանց նորակառույց բնակարան այցելեց Հանրապետության առաջին դեմքը: Հուլիսի 1-ին էլ պատրաստվում են նոր բնակարանում տոնել կնոջ՝ Աննայի 30-ամյակը: Վարդան Մկրտչյանի խոսքով՝ սեփական բնակարան ունենալը ներշնչման նոր առիթ է տալիս ու առաջացնում զգացմունքներ, որոնք բառերով բացատրելի չեն:

«Մեր նպատակն է, որ այս երիտասարդը(խմբ՝ մի քանի ամսական որդու մասին է) չմնա մենակ, ունենա եղ բայրներ, քույրեր, նրանք կկարողանան ունենալ իրենց անկյունը, տեղը: Այն, ինչ ստեղծել է իմ հայրը, հիմա ստեղծում ենք մենք, իրենք էլ կարողանան շատացնել, զարգացնել»,-ասաց թատրոնի երիտասարդ ղեկավարը:

Վարդան Մկրտչյանը հավելեց՝ միշտ էլ հավատացել է, որ կունենա իր բնակարանը քրտնաջան աշխատանքի շնորհիվ: «Արդյունքը չուշացավ, այսօր մեր թատրոնից արդեն 7-8 հոգի այս ծրագրի շահառուներն են»,-ավելացրեց նա: