Չինաստանի վարչապետն այցելել է Տյանցզինում տեղի ունեցած պայթյունների վայր

Չինաստանի վարչապետ Լի Կեցյանն այցելել է Տյանցզին նավահանգիստ , որտեղ անցած շաբաթ արդյունաբերական գոտում տեղի ունեցած պայթյունների հետեւանքով զոհվել է առնվազն 112 մարդ, տուժել է եւս ավելի քան 700 հոգի, տեղեկացնում Է «Արմենպրես»-ը՝ հղում անելով BBC-ին:

Տյանցզինի քիմիկատների պահեստում պայթյուններից հետո դեռեւս անհայտ կորած է համարվում 95 մարդ, նրանցից 85-ը հրշեջներ են: 25 մարդ ներկայում հիվանդանոցնում է գտնվում օրհասական վիճակում, 33-ի ստացած վերքերը գնահատվում են՝ ծանր:

Չինաստանի կառավարության ղեկավարը հանդիպում է ունեցել պայթյուններից տուժած տեղի բնակիչների, ինչպես նաեւ փրկարարների եւ փորձագետների հետ, որոնք շրջակա միջավայրի վիճակի հետազոտություն են անցկացնում:

Greenpeace-ի տվյալներով՝ ճգնաժամային գոտուց վերցված ջրի նմուշներում քիմիական նյութերի բարձր պարունակություն չի հայտնաբերվել: Այդուհանդերձ, քիմիական վարակման սպառնալիքի պատճառով իշխանությունները տարհանում են նախկին պահեստից 3 կիլոմետր շառավղով գտնվող տների բնակիչներին:

Պահեստում պայթյունների հզորությունն այնքան մեծ է եղել, որ զոհվածների մեծ մասի մարմինների ինքնությունն անկարելի է պարզել: Ինչպես հայտարարել է Պեկինի ռազմական օկրուգի շտաբի պետի տեղակալ Շի Լուցզեն, պայթյուններից հետո փրկվածների գտնելու հավանականությունը փոքր է: Գեներալ Լուցզեն դարձել է առաջին պաշտոնական անձը, որը հաստատել է թունավոր ցիանիդի խմբաքանակի առկայությունը պայթյունների վայրում: Նրա գնահատմամբ՝ խոսքը վերաբերում է «մի քանի հարյուր տոննա» նյութի: