«Եվրո 2016»-ում մեկնարկում են քառորդ եզրափակչի հանդիպումները. Լեհաստան- Պորտուգալիա

«Եվրո 2016»-ում պայքարի մեջ են մտնում քառորդ եզրափակիչների ներկայացուցիչները: Առաջին դիմակայությունը Պորտուգալիայի և Լեհաստանի ընտրանիների հանդիպումն է: «Արմենպրես»-ը ներկայացնում է առաջին դիմակայության նախախաղային վերլուծությունը:

Լեհաստանի ազգային հավաքականը: «Եվրո 2016»-ն արդարացրեց լեհ երկրպագուների բոլոր սպասելիքները: Լեհերը, պայքարը սկսելով աշխարհի չեմպիոնների հետ նույն խմբում ,իրենց վստահ և պահպանողական ֆուտբոլով կարողացան հասնել Եվրոպայի առաջնության քառորդ եզրափակիչ: Այստեղ մրցակիցը Պորտուգալիայի հավաքականն է: Առաջին հայացքից թվում է, թե Պորտուգալիան հնարավոր բոլոր ընտրությունների մեջ ամենալավ տարբերակն է, սակայն Ֆեռնանդու Սանտուշի թիմը ապացուցում է, որ նույնիսկ անկայուն ֆուտբոլով հնարավոր է առաջ գնալ:

Եվրոպայի առաջնությունում Լեհաստանի հավաքականի գլխավոր հաղթաթուղթը գրագետ թիմային ֆուտբոլն է: Լեհերը իրենց վստահ են զգում պաշտպանությունում, իսկ հարձակման գիծը կարողանում է կատարել առջևում դրված բոլոր խնդիրները: Թիմի լավագույն ռմբարկուն` Ռոբերտ Լևանդովսկին, դեռ չի կարողանում իր թիմին օգնել գոլերով, սակայն ընդհանուր գործողություններով «Բավարիա»-ի հարձակվողը մեծ օգուտ է ապահովում իր թիմի համար: Հիանալի մարզավիճակ են հավաքել Յակուբ Բլաշիկովսկին և Կամիլ Գրոսիցկին: Հարձակման գծում իրեն հիանալի է դրսևորում Արկադիուշ Միլիկը:

Հաղթահարելով խմբային մրցաշարը՝ Լեհաստանի ընտրանին 1/8 եզրափակիչում հանդիպեց Շվեյցարիայի ազգային հավաքականին: Հիանալի առաջին խաղակեսից հետո Լեհաստանը հաղթում էր մրցակցին 1-0 հաշվով: Իր ազգային հավաքականին առաջ էր մղել Յակուբ Բլաշիկովսկին: 2-րդ կեսում լեհերը զիջեցին դաշտի կենտրոնը, անցան խորը պաշտպանության և դա տվեց իր հետևանքները: Շվեյցարիայի հավաքականի կիսապաշտպան Ջերդան Շաքիրին իր վրա վերցրեց շվեյցարացիների խաղը, և ֆանտաստիկ գոլով հավասարեցրեց հաշիվը: Խաղը տեղափոխվեց լրացուցիչ ժամանակ, որն էլ արդյունք չտվեց: 11 մետրանոց հարվածաշար ում հաջողությունը ուղեկցեց Ադամ Նավալկայի ֆուտբոլիստներին: Գրանիտ Ջակայի վրիպումը Լեհաստանի հավաքականին թույլ տվեց շարունակել պայքարը: Պորտուգալիայի հավաքականի հետ դիմակայությունը լեհերի համար հերթական հաջողությունը արարելու միջոց է:

Պորտուգալիայի ազգային հավաքական:  Պորտուգալիայի հավաքականը «Եվրո 2016»-ում չի փայլում իր դիտարժան խաղով: Արդեն 1/8 եզրափակիչում ֆուտբոլային մասնագետները ակնկալում էին, որ Պորտուգալիան լքելու է պայքարը: Այս հանդիպման ընթացքում էլ պորտուգալացի ֆուտբոլիստների բարձր կարգը ասեց իր խոսքը:

Եվրոպայի առաջնությունում թիմին առաջնորդում են առաջատարներ՝ Լուիշ Նանին և Քրիշտիանու Ռոնալդուն: Այս խաղացողներին կարելի է ավելացնել նաև Ռենատու Սանշեշին: Երիտասարդ ֆուտբոլիստը քիչ խաղաժամանակ է ստանում, սակայն Խորվաթիայի հետ դիմակայությունում դուրս գալով փոխարինման ճանաչվեց հանդիպման լավագույն ֆուտբոլիստ: Լեհաստանի հավաքականը Պորտուգալիայի ընտրանու համար հիանալի հնարավորություն է պայքարը շարունակելու համար: «Եվրոպական բրազիլացիներ»-ը դիմակայության բացահայտ ֆավորիտն են:

«Եվրո 2016»- ի 1/8 եզրափակիչում Պորտուգալիայի հավաքականը ֆուտբոլային իսկական դաս տվեց Խորվաթիային: Խորվաթները առաջնության լավագույն հավաքականներից էին: Դիմակայությունն առաջնության ամենաբարդ հանդիպումը դարձավ: Ամբողջ խաղի ընթացքում թիմերը խաղադաշտում ոչինչ չկարողացան անել և խաղը տեղափոխվեց լրացուցիչ ժամանակ: Այստեղ Պորտուգալիայի միակ գրոհը տվեց իր արդյունքը: Ռոնալդուն հակագրոհի արդյունքում մտավ տուգանային հրապարակ գնդակը ուղարկեց Ռիկարու Կուարեժմային և վերջինս գրավեց դարպասը: Նվազագույն առավելություն և Պորտուգալիան քառորդ եզրափակիչում է:

Լեհաստան-Պորտուգալիա: Այս հավաքականները միմյանց դեմ անցկացրել են 10  հանդիպում: Դիմակայությունում մեկ հաղթանակ ավել ունեն Պորտուգալիայի ընտրանու ֆուտբոլիստները: Պորտուգալիան 4 հաղթանակ ունի, լեհերը 3: Թիմերի միջև ևս 3 հանդիպում ավարտվել է ոչ-ոքի արդյունքով: Պորտուգալիան և Լեհաստանը հանդիպելու են Մարսելի «Վելոդրոմ» մարզադաշտում: Խաղի գլխավոր մրցավարը Ֆելիքս Բրիխն է, իսկ հանդիպումը սկսվելու է Երևանի ժամանակով ժամը `23:00-ին: