Քո մաշկը… Ամուր հիմքերի վրա

Shabat.am-ը գրում է.

Մենք բոլորս միշտ պարտաճանաչ կերպով օգտագործում ենք երանգաքսուք, դիմափոշի, կարմրաներկ... Բայց հաճախ մոռանում ենք այնպիսի կարևոր պարագայի մասին, ինչպիսին է բազան կամ հիմքը դիմահարդարման համար: Այն մասին, թե ինչու են այն օգտագործում, ինչ նշանակություն ունեն բազայի տարբեր գույները և ինչպես են դրանք օգտագործում, կխոսենք այսօր:

Մի քանի փաստ բազայի մասին

• Բազան օգտագործում են նախ և առաջ մաշկի թերությունները քողարկելու, այն հարթեցնելու և երանգը լավացնելու համար:

• Բազայի վրա դիմահարդարումն ավելի լավ է նստում և երկար ժամանակ պահպանում է թարմությունը:

• Բազան ունի երկու կարևոր բաղկացուցիչ՝ սիլիկոնը և պիգմենտը: Առանց սիլիկոնի բազան այլևս բազա չէ. հենց սիլիկոնն է ապահովում դիմահարդարման երկարակեցությունը և հարթեցնում մաշկի ռելիեֆը:

• Պիգմենտները լինում են գունավոր, փայլուն, օպտիկական և այլն: Դրանք բոլորն էլ կոչված են բարելավելու դեմքի մաշկի գույնը: Բազաները ծածկում են կարմրությունը, կապույտ ստվերները աչքերի տակ, մաշկի դեղնությունը:

• Որպես կանոն, բազան քսում են դեմքին միայն ցերեկային խոնավացնող քսուքից հետո՝ կա՛մ ամբողջ դեմքին, կա՛մ նրա առանձին հատվածներին՝ կախված բազայի նշանակությունից (ծածկող է այն, թե լուսավորող): Դրանից հետո արդեն կարելի է կիրառել երանգաքսուք կամ դիմափոշի:

• Եվս մեկ կարևոր փաստ. բազան չի կարելի օգտագործել ծայրահեղ ցածր կամ բարձր ջերմաստիճանի պայմաններում և ամեն օր, քանի որ այն ծանրացնում է դիմահարդարումը:

/Գույն-նշանակություն/

Սպիտակ բազան կոչված է բացացնել մաշկի գույնը, դրա առանձին հատվածները, թարմացնել դեմքն ընդհանրապես:

Մարմնագույնը՝ երանգաքսուքի սովորական գույնը, հարթեցնում է մաշկի երանգը, դրան միատարրություն է հաղորդում, ծածկում է մանր թերությունները:

Դեղինը ծածկում է կապտավուն ստվերները, այդ պատճառով այն հաճախ օգտագործում են աչքերի շրջանում:

Կանաչը վերացնում է մաշկի կարմրությունը, դրանով կարելի է ծածկել մազանոթների ցանցը, նաև սոլյարիում կամ արևի տակ վառվելուց առաջացած կարմրությունը:

Մանուշակագույնը վերացնում է մաշկի անառողջ դեղնությունը, նաև կարող է ծածկել արդեն դեղնած կապտուկը:

Վարդագույն բազան խունացած մոխրագույն մաշկի համար է, այն դեմքի մաշկը հախճապակու պես պայծառ է դարձնում:

Երկնագույնը նույնպես վերացնում է մաշկի դեղնությունն ու հրաշալի կերպով ծածկում ավտոարևայրուքի անհաջող հետևանքները:

Լույսն անդրադարձնող բազան տեսանելիորեն հարթեցնում է մաշկի ռելիեֆը, գույնը, դեմքին պայծառություն է հաղորդում, բայց ոչինչ չի ծածկում: