Ամուսնուս անընդհատ հիշեցնում եմ, որ իրեն շատ եմ սիրում. Հասմիկ Կարապետյան

Tert.am Youth-ը բլից հարցազրույցների շրջանակում փորձել է անսովոր հարցերի միջոցով բացահայտել երգչուհի Հասմիկ Կարապետյանի բնավորությունն ու տրամադրությունը։ Նշենք նաև, որ այսօր երգչուհու ծննդյան օրն է։ Հասմիկը տոնում է իր ծննդյան 39-րդ տարեդարձը ։)

 -Առաջին բանը, որ անում եք արթնանալուց անմիջապես հետո:

-Շնորհակալություն եմ հայտնում Աստծուն, որ այսօրվա լույսն էլ բացվեց ինձ համար:

 -Ի՞նչն է Ձեր առօրյա օրակարգի անբաժանելի մասը կազմում:

-Ամուսնուս անընդհատ հիշեցնելը, որ իրեն շատ եմ սիրում։

  -Քանի՞ ժամ եք հասցնում տանը մնալ:

-Միանշանակ պատասխան չունեմ այս հարցին, քանի որ օրեր են լինում, երբ ընդհանրապես տանից դուրս գալ չեմ ուզում և կան օրեր, երբ մեկ ժամ անգամ չեմ հասցնում տանը լինել:

  -Արդյո՞ք հեշտ է կենցաղը Հասմիկ Կարապետյանի հետ:

-Կարծում եմ շատ հեշտ է, որովհետև կենցաղին մեծ նշանակություն չեմ տալիս: Կենցաղը մեր կյանքի անբաժանելի մասն է և պետք չէ այն խնդրահարույց դարձնել: Իմ կարծիքով, յուրաքանչյուր տղամարդու համար հեշտ կլիներ ինձ հետ կենցաղում:

  -Ո՞րն է Ձեր թաքնված տաղանդը ինչի մասին շատ քչերը գիտեն:

-Սովորել եմ թաքցնել բացասական երևույթները, որոնք ներսումս են կատարվում և սովորել եմ ցույց չտալ իմ թույլ կողմերը:

 

-Ձեր կյանքը միայն ո՞ւմ կվստահեք:
-Աստծուն:

 -Լավագույն գովեստը, որ երբևէ  Ձեր հասցեին լսել եք:

-Լավագույն գովեստն այն է, որ ինձ համարում են անկեղծ մարդ: Ամենագնահատելին հենց դա է:

 -Ամենասիրելի ճաշատեսակը:

- Լոլիկով ձվածեղ:

  -Ամենասիրելի հեղինակը:

- Պարույր Սևակ:

 -Ամենասիրելի երաժշտական խումբը:

-Evenensis:

 -Ամենաանհաջող երգչուհին:

-Բրիթնի Սփիրս, Իրինա Սալտիկովա:

 -Ո՞ւմ հետ կցանկանայիք դուետ ունենալ:

-Գուցե տարօրինակ թվա մարդկանց, բայց կուզենայի Մաքս Վադեևի հետ դուետով հանդես գալ: Կարծում եմ մեր համատեղ աշխատանքը լավ արդյունքների կհանգեցներ: Նրա ստեղծագործական կյանքն ինձ համար շատ հոգեհարազատ է:

 

-Երաժշտությունը…
-Երաժշտությունն ինձ համար կյանք է և ոչ մի վայրկյան կյանքս չեմ կարող պատկերացնել առանց այդ երևույթի:

 -Ամենասիրելի երկիրը:

-Ինձ շատ հոգեհարազատ է Իսպանիան, քանի որ այնտեղ շատ մեծ ջերմություն եմ զգացել: Սիրեցի իսպանական երաժշտության կիրքը, ֆլամենկոն, ծովը…

 -Ամենասիրելի քաղաքը

-Բարսելոնա:

-Անհավանական ճամփորդությունը:
-Ավստրալիան, քանի որ շատ հետաքրքիր էր ու անսպասելի բնապատկերներով, կենդանական աշխարհով և սովորույթներով: Ավստրալիայում ճամփորդությունը երազանքի պես բան էր:

 

-Ծովափնյա սիրավեպ ունեցե՞լ եք:
-Չեմ հիշում (ծիծաղում է ): Երևի թե ունեցել եմ, որովհետև ծովափում հանգստանալ շատ եմ սիրում ու չի բացառվում, որ ինձ են սիրահարվել կամ ես եմ սիրահարվել:

 -Խանդո՞տ եք:

-Խանդոտ չեմ` սեփականատեր եմ:

 -Ի՞նչը կարող է Ձեզ հունից հանել:

-Ինձ հունից հանում է նախանձը, չարությունն ու կեղծիքը:

 -Վերջին անգամ ինչի՞ց եք ամաչել:

-Չեմ ամաչել: Աշխատում եմ այնպես ապրել, որպեսզի չամաչեմ հետո:

 -Ո՞րն է Ձեր ամենասիրելի արտահայտությունը:

-Փառք Աստծոն:

-Ո՞ր տարիքն եք առանձնացնում Ձեր կյանքում:
-Կառանձնացնեմ 23 տարեկանից մինչ 30-նն ընկած ժամանակաշրջանը: Այդ ընթացքում ես ազատվեցի վարդագույն ակնոցից ու ձևավորվեց իմ իսկական «ես»-ը:

 -Երևանում ո՞րն է Ձեր սիրելի անկյունը:

-Աբովյան փողոցը, Սարյան փողոցը, բայց վերջերս ես գերադասում եմ լինել բնության գրկում, քան քաղաքում:

 -Երևանը...

-Երևանն իմ տունն է, այն վայրն է, որտեղ ես սովորել եմ ապրել: Երևանն ինձ տվել է ջերմություն, հոգատարություն, այստեղ է անցել ու անցնում իմ կյանքի լավագույն տարիները:

 -Ո՞վ է Ձեզ հիացնում:

-Ինձ միշտ հիացնում են ուժեղ կամքի տեր մարդիկ:

 -Ինչի՞ց կարող եք հիասթափվել:

-Կեղծավոր մարդկանցից:

 -Վերջին անգամ ե՞րբ եք արտասվել:

-Ապրիլյան պատերազմի ընթացքում եմ շատ արտասվել, երբ այդքան երիտասարդ զոհեր ունեցանք:

 -Թվեք 3 բան, հանուն որի կարելի է ապրել:

-Կարելի է ապրել հանուն սիրո, երազանքների և երեխաների:

    Անի Կարապետյան