Որտե՞ղ են այս տարի հանգստանալու Մայա Պողոսյանն ու ամուսինը

Ամառային հանգստի ամենաթեժ սեզոնն արդեն մեկնարկել է։ Մայա Պողոսյանն այս օրերին պատրաստվում է ծովափնյա հանգստի։ BlogNews-ի հետ զրույցում նա հայտնեց, որ մոտ 2 շաբաթից ամուսնու և 4-ամյա որդու հետ մեկնելու են Հունաստան՝ Կրետե։

«Նախորդ տարի էլ ենք երեխայի հետ այնտեղ հանգստացել։ Մի շարք տարբերակներ նայեցինք, մտածում էինք՝ եվրոպական այլ լողափեր ընտրել, բայց երեխայի հետ հանգստի մեկնելիս կան կոնկրետ չափանիշներ, որոնք ուզում ենք պահել։ Առաջին հերթին երեխայի համար պետք լավ հանգիստ լինի։ Որոշեցինք նույն տեղը և նույն հյուրանոցը գնալ, որովհետև այն լավագույնն է ու ամենահարմարը,- նշեց Մայան՝ նշելով, որ որդին իր պես շատ է սիրում ծով։ -Ձմեռվանից ամեն օր արթնանում է ու ասում՝ մամա, էսօր ծո՞վ ենք գնում, թե՞ լողավազան։ Հիմա արդեն օրերն է հաշվում»։

Մայան նշեց, որ Ալեքսանդրը շատ ակտիվ երեխա է, սակայն իր համար գերագույն հաճույք է որդու հետ հանգստի մեկնելը։ «Ալեքսանդրս սնդիկ է, անընդհատ պիտի ինչ-որ գործողությունների մեջ լինի, իր հետ ակտիվ հանգիստ է սպասվում, բայց երևի թե չկա ավելի մեծ երջանկություն, քան հանգիստն անընդհատ երեխայի հետ անցկացնելը»,- ասաց նա։

Մայան պատմեց, որ մինչ մեր ամուսնությունն Ավետիսը նախընտրել է էքստրեմալ հանգիստ, քանի որ դահուկասպորտի սիրահար է, հաճախ մեկնել է ցուրտ վայրեր, սակայն ինքն ամեն բան փոխել է. «Ինչ ամուսնացել ենք, ոչ մի անգամ նման հանգստի չենք մեկնել։ Ես ցուրտ չեմ սիրում, հիմնականում սիրում եմ ծովային հանգիստ»։

Մոտ 20 օր Հունաստանում անցկացնելուց հետո նրանք կվերադառնան Հայաստան, այուհետև Մայան ու Ավետիսը կմեկնեն Իտալիա։ Ինչպես ամեն տարի, այս տարի ևս, զույգը հանգիստը կկազմակերպի ոչ միայն որդու հետ, այլև առանձին։ «Ամեն տարի այդպես ենք անում, քանի որ երեխայի հետ հանգիստը բոլորովին այլ բան է։ Իտալիայում հավանաբար 20 օր և ավելի կմնանք, որովհետև ուզում ենք տուրիստի կարգվիճակում չլինել և հասցնել զգալ քաղաքների կոլորիտը։ Իտալիայում  եղել ենք, սակայն փոքր գյուղերով, քաղաքներով շրջելու ցանկություն ունենք»,- եզրափակեց նա։

Նյութը՝ Ամալյա Հովհաննիսյանը