Արցախին 4.5 միլիարդ դրամ եւ 137 ավտոմեքենա է նվիրաբերվել

Արցախի Հանրապետության կառավարության մի շարք անդամներ, վարչապետ Արայիկ Հարությունյանի գլխավորությամբ, հուլիսի 8-ին Ազգային ժողովի պաշտպանության, անվտանգության եւ օրինապահպանության մշտական հանձնաժողովին եւ խմբակցությունների ղեկավարներին են ներկայացրել օպերատիվ շտաբի գործունեության եռամսյակային հաշվետվությունը, որը ներառում էր նաեւ ապրիլի 4-ից ի վեր ԱՀ կառավարության հատուկ հաշվեհամարում հանգանակված գումարների ծախսման վերաբերյալ գաղտնի տեղեկություններ:

Ինչպես տեղեկացնում են Արցախի Հանրապետության կառավարության աշխատակազմի տեղեկատվության եւ հասարակայնության հետ կապերի բաժնից՝ 2016թ. հուլիսի 1-ի դրությամբ՝ 6 հազար 831 ֆիզիկական եւ իրավաբանական անձանց կողմից կառավարության հատուկ հաշվեհամարին է փոխանցվել 2 միլիարդ 334 միլիոն 853 հազար 200 դրամ, 3 միլիոն 510 հազար 147 ԱՄՆ դոլար, 173 հազար 728 եվրո եւ 62 միլիոն 121 հազար 313 ռուբլի կամ ընդհանուր առմամբ՝ 4 միլիարդ 562 միլիոն 175 հազար 600 դրամ:

Ապրիլի 4-ից մինչև հուլիսի 1-ը հավաքագրված գումարներից տարբեր նշանակության ծախսեր են կատարվել, որոնցից մասնավորապես կատարվել է փոխանցում ԼՂՀ պաշտպանության նախարարությանը՝ 597 միլիոն 826 հազար, ռազմական նշանակության տեխնիկայի եւ սարքավորումների ձեռքբերում՝ 736 միլիոն 529 հազար 100, ինժեներական աշխատանքների կատարում՝ 356 միլիոն 452 հազար 800, ՊԲ կարիքների համար ենթակառուցվածքների, տրանսպորտի եւ կապի ծառայությունների ու կապիտալ ծախսերի իրականացում՝ 198 միլիոն 859 հազար 700, զորակոչված քաղաքացիներին եւ կամավորականներին դրամական աջակցության տրամադրում՝ 532 միլիոն 372 հազար 100 դրամ:

Բացի ֆինանսական հանգանակությունից, կառավարությունը ստացել է նաեւ զգալի ծավալի իրային եւ պարենային աջակցություն, որոնք տրվել են կարիքավոր քաղաքացիներին եւ պաշտպանության նախարարությանը: Դրանց շարքում, 137 նվիրաբերված մեքենաները փոխանցվել են գլխավորապես պաշտպանության նախարարությանը, ինչպես նաեւ մի շարք այլ պետական մարմինների:

Քրիստինա Տեր-Մաթեւոսյան