Որտեղ են նախընտրում հանգստանալ հայ պաշտոնյաները

Wnews.am-ը գրում է.

Ամառային արձակուրդներին հաշված օրեր  են մնացել եւ շատերը գերհագեցած աշխատանքային ամիսներից հետո պարզապես երազում են լավ հանգստի մասին։ Ոմանք արդեն հասցրել են պլանավորել, թե որտեղ են  մեկնելու հանգստի։

Հայ պաշտոնյաները եւս ամեն տարի մեկնում են հանգստի։ Ավելին՝ նրանցից շատերի արձակուրդը ոչ թե տարվա մեջ մեկ կամ երկու, այլ` մի քանի անգամ է։

Իսկ որտեղ են նախընտրում հանգստանալ հայ պաշտոնյաները. Wnews.am-ի հրապարակումն այս մասին է։

Նախագահ Սերժ Սարգսյանը ամառային արձակուրդի է մեկնում հիմնականում հուլիսի վերջին։ Նրա հանգստի վայրի մասին պաշտոնապես ոչինչ չի նշվում։

Նախագահի մամուլի ծառայությունը, որպես կանոն, հաղորդագրություն է տարածում՝ նշելով.

«Նախագահ Սերժ Սարգսյանը մեկնել է կարճատև արձակուրդ, որի մի մասը կանցկացնի արտերկրում»։

Տեղական լրատվամիջոցները վկայակոչելով իրենց աղբյուրները, նշում են, որ նախագահը սիրում է հանգստանալ Գերմանիայի Բադեն-Բադեն քաղաքի առողջարանում։ Բացի այս, երկու տարի առաջ կրկին մամուլում տեղեկություններ հրապարակվեցին այն մասին, որ Սերժ Սարգսյանն իր ձմեռային կարճատեւ հանգիստն է վայելում Կորեայի Հանրապետության մայրաքաղաք Սեուլում։ Ըստ նույն աղբյուրների՝ նրա հետ արձակուրդում էին նաեւ Արցախի նախկին նախագահ Արկադի Ղուկասյանն ու ՀՀ ֆինանսների նախարար Գագիկ Խաչատրյանը։

ՀՀ երկրորդ նախագահ Ռոբերտ Քոչարյանը ակտիվ հանգստի սիրահար է։ Դեռեւս իր նախագահության տարիներին եւ այժմ էլ Ռոբերտ Քոչարյանը սիրում է հանգստանալ նաեւ Հայաստանում՝ Սեւանում, Ծաղկաձորում։

 

ԱԺ նախագահ Գալուստ Սահակյանը տարիներ առաջ տված հարցազրույցում ասել էր, որ նախընտրում է արձակուրդն անցկացնել Հայաստանում, քանի որ չի սիրում երկրից երկար բացակայել։

«Ես շատ երկար չեմ կարողանում Երևանից բացակայել: Ես հանգիստ եմ, բայց բացառված չի, որ ինչ-որ մի տեղ կգնամ, բայց հատուկ նշանակություն չեմ տալիս, որ այս կամ այն տեղը գնամ»,- ասել է նա։ Իսկ հարցին, թե որքան գումար է ծախսում հանգստի վրա՝ պատասխանել է.

«Նայած ուր եմ գնում: Եթե թոռներով ու ընտանիքով ենք գնում, ավելի շատ ենք ծախսում: Օրինակ՝ 1 մլն կամ 1,5 մլն։ Եթե այստեղ ենք լինում ու մի քանի օրով մի տեղ ենք գնում՝ 100 000, 50 000, 200 000»։

ԱԺ պատգամավորներ Գագիկ Ծառուկյանը, Սամվել Ալեքսանյանը, ինչպես նաեւ «Տաշիր» ընկերությունների խմբի նախագահ Սամվել Կարապետյանը մտերիմ ընկերներ են։ Եռյակը ամեն տարի միասին հանգստանում է Դուբայում։ Բայց, բնականաբար, մեծահարուստների հանգիստն այսքանով չի սահմանափակվում։ Գագիկ Ծառուկյանը, օրինակ, հաճախ է լինում Մոնակոյում։

Ի դեպ, ըստ մամուլում շրջանառվող լուրերի, Գագիկ Ծառուկյանը լողափ ունի Բելառուսում եւ այնտեղ եւս սիրում է վայելել իր հանգիստը։

ՀՀ վարչապետ Հովիկ Աբրահամյանի որդին՝ Արտաշատի քաղաքապետ Արգամ Աբրահամյանը սիրում է հանգստանալ Մոնտե Կառլոյում։

Ի դեպ, այս նկարում Արգամ Աբրահամյանի հետ Մոնտե Կառլոյում է նաեւ Ուկրաինայում Հայաստանի դեսպան Անդրանիկ Մանուկյանի փեսան՝ երգչուհի Լուսինայի ամուսին Գառնիկ Առաքելյանը։

ՀՀ պաշտպանության նախարար Սեյրան Օհանյանը իր հարցազրույցներից մեկում նշել էր, որ նախընտրում է հանգիստը վայելել Հայաստանում։ Նա եւ իր ընտանիքի անդամներն ակտիվ հանգստի սիրահարներ են.

«Նախընտրում ենք այնպիսի հանգիստ, ինչպես աշխատում ենք և առօրյայում ենք, սպորտ, լող և այլն»,- նշել էր նախարարը:

ԱԺ պատգամավոր Արթուր Գեւորգյանը հաճախ է ընտանիքի հետ հանգիստը վայելում արտերկրում։

Դատելով ֆեյսբուքյան լուսանկարներից՝ պատգամավորը կնոջ՝ ՀՀ ոստիկանապետ Վլադիմիր Գասպարյանի դստեր Աննայի եւ իրենց երեխաների հետ սիրում է լինել ԱՄՆ-ում՝ մասնավորապես Դիսնեյ Լենդում։

Բացի այս, պատգամավորը եղել է նաեւ Վարշավայում, Պալմա Դե Մայորկայում եւ այլն։

 

ԱԺ փոխնախագահ Էդուարդ Շարմազանովը սիրում է ընտանիքի հետ հանգստանալ Հունաստանում։

«Ես ավանդույթները չեմ խախտում, ես պահպանողական, ավանդապաշտ անձնավորությունում եմ, ինձ համար փորձված թանը անփորձ մածունից լավ է, ես գումար ծախսում եմ միայն Հայաստանում և Հունաստանում, ուրիշ ոչ մի տեղ»,- հարցազրույցներից մեկում ասել է Շարմազանովը։

ԱԺ պատգամավոր, երգչուհի Շուշան Պետրոսյանն ավելի քան քսան տարի է, ավանդույթի համաձայն, ամռանը հանգստանում է Սեւանի Շորժա ափին։

Շարունակությունը՝ մեր հաջորդ հրապարակումներում։