Գնացել են ջուր տանելու, տեսել են մահացած են. Քաչոտյաններին սպանված հայտնաբերել են կնոջ ծնողները

News.am-ը գրում է.

Ջավախքի Ախալքալաքի շրջանի Վաչիան գյուղում հուլիսի 9 գիշերը  սեփական տանը սպանված Քաչոտյանների ընտանիքի 4 անդամներին հայտնաբերել են սպանված 37-ամյա Օֆելյա Քաչոտյանի ծնողները:

NEWS.am-ի հետ զրույցում Վաչիանի բնակիչ տիկին Ջուլիան (անունը փոխված է) պատմեց, որ հուլիսի 10-ին ժամը 15:00-ին Օֆելյայի ծնողները գնացել են Քաչոտյանների տուն ջուր տանելու եւ նկատել, որ տան պատուհանները մրոտված են, կոտրված: Սպանված 37-ամյա կնոջ ծնողները սկզբում կարծել են` գազի պայթյուն է եղել, սակայն, ներս մտնելով, տան 4 անդամներին մահացած են հայտնաբերել. «Սկզբում բոլորը մտածում էին, որ գազից են խեղդվել, հետո, երբ իրավապահները եկան, միանգամից ասացին, որ սպանություն է եղել: Սկզբում, ամբողջ գյուղով մտածում էինք` թուրքերի արածն է, բայց պարզվեց, որ մեր գյուղացու արածն է»:

Տիկին Ջուլիայի խոսքով` Քաչոտյանների սպանության մեջ մեղադրվող 24-ամյա Նոդար Ակոպովը հիմնական աշխատանք չի ունեցել, գյուղում բնակվել է իր կնոջ եւ երեխայի հետ. հաճախ է ալկոհոլ օգտագործել, անգամ խոսակցություններ կան, որ սպանության պահին եղել է թմրանյութի ազդեցության տակ: Նա իմացել է, որ ընտանիքի հայրը Ռուսաստանից գումար է ուղարկել եւ մտել է Քաչոտյանների տուն` գողության նպատակով:

Նոդար Ակոպովը սկզբում սպանել է 37-ամյա կնոջն ու ավագ աղջկան` Ասյային, այնուհետեւ 13-ամյա Արմինեին եւ 5-ամյա Սերգեյին: Նոդարը կնոջն ու երեխաներին սպանելուց հետո խոշտանգել է նրանց մարմինները` Արմինեին եւ Ասյային փաթաթել է գորգերի մեջ` այրելու նպատակով, իսկ 5-ամյա Սերգեյի դեմքին եւ մարմնի այլ հատվածներին տարբեր վնասվածքներ հասցրել:  Հանցանքի վայրից դուրս գալուց հետո, Նոդարն իր հետ վերցրած  Քաչոտյաններին պատկանող երկու բջջային հեռախոսները նետել է հարեւանությամբ գտնվող տան բակը, որոնք հետագայում հայտնաբերել եւ առգրավել են իրավապահները:

«Առողջ մարդը նման բան չէր անի, ասում են` նարկոտիկի տակ է եղել, որ նման բան է արել: Քաչոտյանների հարեւանն է էդ սպանողի  մայրը: Ինչ-որ  ամուսնացած է եղել մեկի հետ, հետո բաժանվել է, ասում են` հայրը վրացի է եղել, կամ շուռ տված հայ: Գյուղում հիմնականում ոչ մեկի հետ չէին շփվում` վատ վարքի տեր մարդիկ էին: Մոր հետ չէր ապրում, առանձին ընտանիքի հետ էր ապրում, կինն էլ անընդհատ բողոքում էր իրենից,որ շատ է խմում եւ այլն… Մենք ամբողջ գյուղով պահանջում ենք, որ դրան ոչ թե դատեն, այլ կապեն գյուղի մեջտեղում ու վառեն, դա էլ է քիչ դրան պատժելու համար»,-ասաց կինը: 

Տիկին Ջուլիետան նշեց, որ Քաչոտյանները գյուղի օրինակելի ընտանիքներից էին` ապրում էին սեփական քրտինքով վաստակած գումարով, երեք երեխաների ծնողներն ամեն ինչ անում էին, որպեսզի գումար վաստակեն իրենց երեք երեխաներին կրթության տալու համար. «Ամբողջ գյուղը սգում է նրանց մահը, փոքրը` Սերգեյը, մանկապարտեզ էր գնում, Արմինեն շատ լավ սովորում էր, Ասյան էլ այս տարի էր ավարտել դպրոցը, արդեն գործերը տվել էին, որ Ախալցխայում ինստիտուտ ընդունվի, քննությունների պատասխաններին էին անհամբեր սպասում»:

Քաչոտյանների տան բակում մինչեւ հիմա կախված է սպանված Օֆելյայի արած վերջին լվացքը, քիչ հեռու 5-ամյա Սերգեյի ճոճանակն է քամուց օրորվում, Ասյայի եւ Արմինեի մշակած հանդամասը դատարկ է, իսկ տնից քիչ հեռու` գյուղի գերեզմանատանը, Ռուսաստանի Դաշնությունից նոր վերադարձած ընտանիքի հայրը` Վաղինակը, արցունքները մի կերպ խեղդելով` իր երեք երեխաներին եւ կնոջը  հողին  հանձնելու ժամանակ  նրանց համար փորված փոսում մի բուռ հող է լցնում…

Ավելի վաղ տեղեկացրել էինք, որ Քաչոտյանների 4 անդամներին հուլիսի 13-ին հուղարկավորել են գյուղի գերեզմանատանը:

Հիշեցնենք, որ Քաչոտյանների սպանության մեջ մեղադրվում է նույն  գյուղի 24-ամյա բնակիչ Նոդար Ակոպովը: Նա ոստիկանությունում ինքնախոստովանական ցուցմունք  է տվել եւ մանրամասն ներկայացրել` սպանության մանրամասները:

Ավելի վաղ NEWS.am-ը տեղեկացրել էր, որ Ջավախքի Ախալքալաքի շրջանի Վաչիան գյուղում Քաչոտյանների ընտանիքի 4 անդամներին` մորը եւ 5, 13, 18 տարեկան երեխաներին, հուլիսի 10-ին, հարեւանները հայտնաբերել են սպանված:

Նախնական տեղեկություններով,  հանցագործը մորն ու աղջիկներին սպանել է  բութ գործիքի հարվածներով, իսկ տղային խեղդամահ է արել:

Նշենք, որ Վաչիանը Ջավախքի Ախալքալաքի շրջանի հայաբնակ գյուղերից է, Վաչիանի կողքով է անցնում նորաբաց թուրք-վրացական միջպետական սահմանը:

Մահացածներին գտնելու պահին տան իրերը` սեղան ու աթոռները հատակին ընկած են եղել, իսկ տունը ծխից մրոտված:

Նշենք, որ ընտանիքի հայրը` Վաղինակ Քաչոտյանը,  Ռուսաստանի Դաշնությունում է` արտագնա աշխատանքի: