Անզգուշությամբ այրել է հարեւանի այգին

Արագածոտնի մարզի ընդհանուր իրավասության դատարանում հարուցվել է քրեական գործ՝ անզգուշությամբ հարեւանի հողամասը այրելու եւ խնձորի ծառերին վնաս հասցնելու դեպքի առթիվ:

Ըստ Դատական տեղեկատվական համակարգի՝ Ոսկեվազ գյուղի բնակիչ Քնարիկ Հովհաննիսյանը այս տարվա ապրիլի 1-ին, ժամը 16:00-ի սահմաններում իր հողամասում մաքրման աշխատանքներով զբաղվելիս՝ անզգույշ վարվելով կրակի հետ, ձեռքին եղած լուցկիով այրել է հողամասի չոր մոլախոտերը, որի արդյունքում կրակը տարածվել եւ անցել է Սեյրան Մեջլումյանին պատկանող հողամաս: Արդյունքում մասամբ ոչնչացել, վնասվել են հողամասում գտնվող 148 հատ 2-4 տարեկան խնձորի ծառեր:

Քնարիկ Հովհաննիսյանին մեղադրանք է առաջադրվում Սեյրան Մեջլումյանին խոշոր չափի` 888 հազար դրամի վնաս պատճառելու համար:

Նա մեղադրվում է Քրեական օրենսգրքի 186-րդ հոդվածի(Գույքն անզգուշությամբ ոչնչացնելը կամ վնասելը) երկրորդ մասի հատկանիշներով: Այն պատժվում է տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ ուղղիչ աշխատանքներով՝ մեկից երկու տարի ժամկետով, կամ ազատազրկմամբ՝ առավելագույնը երկու տարի ժամկետով:

Վերջինս ստորագրությամբ ազատ է արձակվել:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ,քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի`օրինական ուժի մեջ մտած դատավճռով:

Քրիստինա Տեր-Մաթեւոսյան