Ինձ համար ֆենոմենալ ուժ է մայրական բնազդն ու բալիկի կապվծությունը՝ մայրիկին. Էմմա Ասատրյանը՝ չորս ամսական որդու եւ ծրագրերի մասին

ՖՈՏՈ 15 Հուլիս, 2016 21:57

Այսօր՝ հուլիսի 15-ին, լրանում է Էմմա Ասատրյանի եւ դուդուկահար Էմմանուել Հովհաննիսյանի առաջնեկի՝ Անրիի չորս ամսականը:

Life.panorama.am-ը երգչուհու հետ խոսել է նոր կարգավիճակի եւ սպասվելիք աշխատանքների մասին:

«Որդուս ծնունդից հետո յուրաքանչյուր օրս անցնում է նրա հետ. մենք ամբողջ օրը խաղում ենք, երաժշտություն ենք լսում, լողանում ենք օրը 1000 անգամ, ես հեքիաթներ եմ պատմում նրան կամ միասին լսում ենք տարբեր հեքիաթներ: Այսինքն՝ օրս լիքն է բառի բուն իմաստով, հիմա մտածում եմ, երբ մեծանա, ես ինչպե՞ս եմ անցնելու աշխատանքի, քանի որ նա ասես իմ «բռոշկան է» դարձել ու միշտ ինձ հետ է: Ես այնքան շատ եմ խոսում իր հետ, որ անգամ կողքից կատակելով ասում են, որ եթե այսպես շարունակվի, Անրին վեց ամսականից կխոսի ու կքայլի: Ես պարզապես վայելում եմ որդուս հետ անցկացրած վայրկյանները, անգամ երբ հոգնում եմ, այդ զգացողությունն էլ հաճելի է թվում. ինձ համար ֆենոմենալ ուժ է մայրական բնազդն ու բալիկի կապվծությունը՝ մայրիկին»,- պատմեց երջանիկ մայրիկը:

Խոսելով որպես մայրիկ իր տեսակից՝ Էմման նկատեց.

«Ես, իհարկե, գիտեի, որ մեծ պատասխանատվություն կզգամ, երբ մայր դառնամ, ու Փառք Աստծո, իսկապես այդպես էլ եղավ: Այո, շատ մեծ պատասխանատվություն է ծնող դառնալը, ես անգամ իմ առողջության նկատմամբ եմ ավելի ուշադիր դարձել. այլեւս անպետք սնունդ չեմ ուտի, անհրաժեշտության դեպքում ավելի տաք կհագնվեմ, որ չհիվանդանամ, քանի որ իմ ձագուկն աշխարհում ամենաշատը իմ կարիքն ունի»:

Երգչուհին պատմեց, որ բալիկին ավելի շատ հայրիկին է նմանեցնում.

«Տղաս ամուսնուս անատոմիկ շարունակությունն է, նա անասելի նման է հայրիկին, թեպետ ասում են, թե աչուկներն ինձ են նման, ինքս էլ իր բաց երանգի աչքերը նմանեցնում եմ մայրական պապիկիս աչքերին, միմիկաներով էլ հայրիկիս է նման, բայց մեկ է՝ ինքն ամբողջությամբ Էմմանուելն է: Անրիս հանգիստ բալիկ է, շատ է սիրում դասական երաժշտություն, ի դեպ՝ հղիության ընթացքում չգիտեմ ինչու ես, ասես, դասական երաժշտության ծարավ զգայի, անընդհատ ուզում էի լսել, դե իսկ հիմա էլ նա է շարունակում լսել, անգամ, երբ փոխում եմ ձայնասկավառակը, սկսում է դժգոհ ձայներ հանել: Տղաս նաեւ շատ է սիրում լողալ ու դրսում լինել»,- ծիծաղելով պատմեց երջանիկ մայրկը:

Էմմա Ասատրյանն ու Էմմանուել Հովհաննիսյանն իրենց որդուն մկրտեցին մեկ ամիս առաջ, երբ լրացավ փոքրիկի երեք ամսականը, հետաքրքրվելով, թե ինչո՞վ էր պայմանավորված բալիկին շուտ մկրտելու զույգի որոշումը, երգչուհին նշեց.

«Ըստ Հայ Առաքելական Եկեղեցու՝ երեխային պետք է մկրտել ծննդյան 7-րդ օրը, սակայն այդ ժամանակ Անրին դեռ շատ փոքրիկ էր, ուստի մենք որոշեցինք այդ կարեւոր արարողությունն իրականացնել հնարավորինս շուտ: Մենք մեր բալիկին մկրտեցիք, որպեսզի նա առողջ ու պաշտպանված լինի, որպեսզի նա դառնա օրհնված քրիտոնյա: Ես ու ամուսինս վստահ ենք, որ հավատքը ամենակարեւորն է, երբ հավատում ես, կարող ես անհնարինն էլ անել: Մենք ոչ մի ճոխություն այդ օրը թույլ չտվեցինք ու սխալ ենք համարում, երբ հայերը մկրտության արարողությունը վերածում են ճոխ հայկական խնջույքների, դա արդեն մեղքի է վերածվում: Մեր որդու մկրտության արարողությանը հրավիրել էինք մեր բարեկամներին ու ընկերներին, որից հետո հենց եկեղեցու բակում իմ պատրաստած տարոսիկները բաժանեցինք, մի փոքր քայլեցինք ու վերադարձանք տուն: Ի դեպ՝ մկրտությունը կայացավ Էջմիածնի Սուրբ Գայանե եկեղեցում, որտեղ եւ տեղի էր ունեցել մեր Պսակադրությունը»:

Էմմա Ասատրյանը հայտնեց, որ ծրագրում է սեպտեմբերից վերադառնալ աշխատանքի.

«Առաջ Աստված՝ հուսամ սեպտեմբերից կկարողանամ ընդունել աշակերտներիս: երգելու հետ կապված էլ այս պահին ցանկություններս շատ ավելի մեծ են, քան մինչ բալիկիս ծնունդը: Հիմա ցանկություն ունեմ բենդով փոքրիկ մենահամերգով հանդես գալ, հուսամ՝ կկարողանամ դա եւս իրականացնել: Այս ամենից էլ զատ՝ նոր երգեր կան, որոնք եւս սպասում են կյանքի կոչվելուն»,- ավարտեց երգչուհին: