Կյանքից հեռացել է արվեստաբան, թանգարանագետ Անահիտ Ֆլջյանը

Երկարատև, ծանր հիվանդությունից հետո վախճանվել է արվեստաբան, թանգարանագետ, Հայաստանի նկարիչների, Հայաստանի դիզայներների միությունների անդամ, Երևանի Ռուսական արվեստի թանգարանի երկարամյա տնօրեն Անահիտ Ֆլջյանը:

Անահիտ Գուրգենի Ֆլջյանը ծնվել է 1949թ., Երևանում: 1972թ. ավարտել է Երևանի գեղարվեստաթատերական ինստիտուտի արդյունաբերական արվեստի բաժինը և նույն թվականից աշխատել դիզայնի տարբեր ասպարեզներում՝ արդյունաբերական և կենցաղային սարքավորումների նախագծում, տպագիր արտադրանքի գրաֆիկական դիզայն, համակարգչային գրաֆիկա: 1973-78թթ. հարազատ ինստիտուտի դիզայնի լաբորատորիայի վարիչն էր, 1978-83թթ.՝ «Անի» գիտաարտադրական միավորման դիզայնի բաժնի պետը:

1979թ. ավարտել է ՀՀ ԳԱԱ Արվեստի ինստիտուտի ասպիրանտուրան: 1974 թվականից արվեստաբանական հոդվածներով հանդե ս է եկել հանրապետական և ԽՍՀՄ մամուլում:

Անահիտ Ֆլջյանի մասնագիտական և կազմակերպչական հմտությունները հատկապես դրսևորվեցին Ռուսական արվեստի թանգարանում (պրոֆեսոր Ա.Աբրահամյանի հավաքածու), որի տնօրենն էր 1983-2009թթ.: Ա.Ֆլջյանի և դիզայներ Հարություն Սամուելյանի երկարամյա համագործակցությունը նշանավորվել է մի քանի տասնյակ այնպիսի բարձրաճաշակ հրատարակություններով, ինչպիսիք են Ռուսական արվեստի թանգարանի առաջին ցուցադրության կատալոգը, նույն թանգարանը ներկայացնող ալբոմը, Ադամ Միցկևիչի «Հատընտիր», Նամի Միկոյանի «Սիրով և թախիծով» գրքերը, «Հայաստանի պատմության թանգարան», «Անձինք Նուիրեալք», «Հայելու նմանակ. կորուստը և ձեռք բերելը», «Հայաստանի մայրաքաղաքները», «Սուրբ Ղազարի հարությունը», «Հայաստան. Երկիր ուխտավայր», «Հայաստան. Քրիստոնեական ճարտարապետության 1700 տարին», «Երևանի Սուրբ Գրիգոր Լուսավորիչ եկեղեցի» և այլ գիրք-ալբոմներy, գրաֆիկական տարբեր ոլորտների աշխատանքներy: Հեղինակ է նաև փոստային նամականիշների, բացիկների, ծրարների: Ա.Ֆլջյանի աշխատանքները բազմիցս ցուցադրվել են Նկարիչների և Դիզայներների միությունների կազմակերպած ցուցահանդեսներում:

Անահիտ Ֆլջյանի գործունեությունը գնահատվել է պետական-հասարակական պարգևներով:
Նրա՝ հմուտ դիզայներ-արվեստաբանի, թանգարանային գործի գիտակի, հասարակական գործչի և սրտացավ ընկերոջ հիշատակը միշտ անմար կմնա նրան ճանաչողների սրտերում:

Ինչպես տեղեկացրին ՀՀ մշակույթի նախարարությունից, հանգուցյալի հոգեհանգիստը տեղի կունենա օգոստոսի 21-ին, ժամը 18:00-ից՝ Թումանյան 9, բն. 32 հասցեում, վերջին հրաժեշտը՝ օգոստոսի 22-ին, ժամը 12:00-14:00-ն, հուղարկավորությունը՝ Երևանի Սովետաշենի գերեզմանատանը: