Միջազգային հանրության անարդյունք կոչերն Ալիևին

Նախորդ շաբաթ Ադրբեջանը միջազգային մամուլում հերթական անգամ հայտնվեց միջազգային մամուլի ուշադրության կենտրոնում իրավապաշտպանների ու լրագրողների նկատմամբ կիրառվող կտտանքների ու խոշտանգումների պատճառով:

Բաքվի ծանր հանցագործությունների դատարանն իրավապաշտպան Լեյլա Յունուսին դատապարտել է 8,5 տարվա ազատազրկման, իսկ նրա ամուսնուն՝ Արիֆ Յունուսին՝ 7 տարվա ազատազրկման՝ ունեցվածքի, այդ թվում՝ անշարժ գույքի բռնագրավմամբ։ Սրան հաջորդեց նաև լրագրող Ռասիմ Ալիևի սպանությունը, որի մանրամասներն մինչ օրս ամբողջությամբ չեն բացահայտվել:

Միջազգային հանրությունը՝ հանձինս միջազգային կազմակերպությունների, անմասն չմնաց Ադրբեջանում ծավալվող իրադարձություններին: ԱՄՆ-ն, Մեծ Բրիտանիան, Եվրոպայի Խորհուրդը, ԵԱՀԿ-ն և ԵԽԽՎ-ն խստորեն քննադատել են Յունուսների ազատազրկումը:

ԱՄՆ-ի պետքարտուղարությունն իր հայտարարության մեջ խիստ քննադատել է ադրբեջանցի իրավապաշտպաններ Յունուսների դատավճիռն ու պահանջել է անհապաղ ազատ արձակել նրանց՝ նշելով, որ դա բխում է Ադրբեջանի շահերից՝ միջազգային պարտավորությունները կատարելու և իրենց քաղաքացիների իրավունքներն ապահովելու համար, և կարևոր քայլ է՝ բարգավաճ ու կայուն ապագա կառուցելու ճանապարհին: Պետքարտուղարությունը նաև անհանգտացած է դատական գործընթացի ժամանակ թույլ տրված խախտումներով, և հատկապես՝ իրավապաշտպանների առողջությամբ:

Մեծ Բրիտանիայի՝ եվրոպական հարցերով նախարար Դևիդ Լիդինգթոնը ևս խոր մտահոգություն է հայտնել Յունուսների դատավարության առնչությամբ` նշելով, որ դատական գործի որոշ կողմեր, որոնք նկատել են մեր դիտորդները, հիմքեր են տալիս ասելու, որ դատավճիռը քաղաքական դրդապատճառներ ունի։ Լիդինգթոնը հանդիպումների ընթացքում պարբերաբար բարձրաձայնում է Ադրբեջանում մարդու իրավունքների ծանր վիճակի վերաբերյալ հարցը:
Եվրոպայի խորհրդի գլխավոր քարտուղար Թորբյորն Յագլանդը քննադատել է լրագրող Ալիևի սպանությունը՝ Ադրբեջանի իշխանություններին կոչ անելով ամեն ինչ անել երկրում ներքին երկխոսությունը և վստահությունը քաղաքացիական հասարակության և իշխանությունների միջև վերականգնելու հարցում:

ԵԱՀԿ լրատվամիջոցների ազատության հարցերով ներկայացուցիչ Դունյա Միատովիչը ևս քննադատել Ալիևի սպանությունը, և իր անհանգստությունն արտահայտող համապատասխան նամակ է հղել Ադրբեջանի նախագահ Իլհամ Ալիևին՝ հավելելով, որ Ադրբեջանում ԶԼՄ-ների ազատության վերաբերյալ իրավիճակը օրըստօրե վատթարանում է:

Եվրոպայի խորհրդի խորհրդարանական վեհաժողովի (ԵԽԽՎ) նախագահ Անն Բրասերն իր անհանգստությունն է հայտնել Յունուսների ազատազրկման վերաբերյալ տեղեկատվության հետ կապված: ԵԽԽՎ-ն բազմիցս կոչ է արել Ադրբեջանի իշխանություններին դադարեցնել քաղբանտարկյալների նկատմամբ կիրառվող դաժանություններն ու ձերբակալությունները, սակայն Ադրբեջանում իրավիճակը ընդհանրապես չի փոխվում:

ԵՄ Գերագույն հանձնակատար Ֆեդերիկա Մոգերինին անդրադարձել է ադրբեջանցի իրավապաշտպանների`Յունուսների դատավճռին ու նշել, որ դատավճիռը հաստատում է Ադրբեջանի` մարդու իրավունքների և հիմնարար ազատությունների չպահպանելու միտումը: ԵՄ-ն ևս կոչ է արել Ադրբեջանին ազատ արձակել Յունուսներին:

Եվրոպական խորհրդարանի նախագահ Մարտին Շուլցը նույնպես անդրադարձել է Ադրբեջանում լրագրողների հանդեպ տեղի ունեցող իրավիճակին՝ նշելով, որ Ադրբեջանում քաղաքացիական հասարակությունը ծայրահեղ ճնշված է:
Վաղուց արդեն գատնիք չէ, որ Ադրբեջանում լրագրողներն ու իրավապաշտպանները շարունակաբար ծայրահեղ վախի միջավայրում են գտնվում: Նրանք պարբերաբար բերման են ենթարկվում և ապրում են սպառնալիքների մթնոլորտում, իսկ Ալիևի ակնառու բռնապետական վարչակազմը «թքած ունի» միջազգային հանրության կոչերի ու հորդորների վրա:

Նարինե Մեհրաբյան