Դերասան-ամուսիններ Յուրի Իգիթխանյանն ու Անուշ Սարգսյանը շուտով կրկին ծնողներ կդառնան: Life.panorama.am-ին Յուրին պատմել է բարի լուրն իմանալու եւ ընտանեկան անցուդարձի մասին.
«Շատ բարի ու երջանիկ զգացողություններ ունեցանք, երբ իմացանք, որ կրկին ծնողներ ենք դառնալու: Թեեւ ծնողներ դառնալու ապրումները մեզ ծանոթ էին, բայց միաժամանակ ամեն ինչ կարծես թե նորովի լիներ, մի բան կրկնվեց՝ թվում է, թե որքերդ կտրվում են գետնից ու դու ճախրում ես»,- նշեց Յուրի Իգիթխանյանը:
Դերասանների ընտանիքում կրկին որդի կծնվի.
«Մեր բալիկի սեռը հայտնելիս հետաքրքիր անակնկալ էինք կազմակերպել մեր բարեկամների եւ ամենակարեւորը ավագ որդուս՝ Սերգեյի համար: Իհարկե, հպարտություն եմ զգում, որ շուտով երկու տղաների հայր եմ լինելու, սակայն ֆանատիզմ այդ հարցում չկա: Ինձ ավելի շատ մի փաստ է ուրախացնում՝ եղբայրը եղբայր կունենա, իսկ ապագայում էլ քույրիկը քույրիկ կունենա. մենք շատ երեխաներ ենք ուզում, որ տունը լի լինի ճիչով ու ծիծաղով»,- ժպիտով նկատեց դերասանը:
Յուրին ու Անուշը դեռեւս վերջնականապես անվան ընտրություն չեն կատարել, հայրիկի խոսքով՝ տղան հետազոտությունների ժամանակ շրջված է եղել ու դեմքը ցույց չի տվել.
«Մենք դեռ չենք տեսել մեր փոքրիկ դեմքը, այդ իսկ պատճառով անվան հարցում տատանվում ենք: Իհարկե, տարբերակներ ունենք, բայց այդ մասին կհայտնենք, երբ ծնվի փոքրիկը»,- հավելեց նա:
Յուրիի խոսքով՝ երկամյա Սերգեյին արդեն իսկ պատրաստում են եղբայր ունենալու մտքին.
«Սերգեյը միշտ գերխնամքի կարիք ունի: Մենք արդեն պատրաստում ենք նրան, որ շուտով եղբայր է ունենալու, նա արդեն գիտի, որ պետք է հոգ տանել փոքրիկների մասին, կիսվել խաղալիքներով: Արդեն Անուշի փորիկին դիմելով՝ ասում է. «Մամա, լյալյա»: Մենք պատրաստ ենք ճիշտ ուղիով տանել մեր փոքրիկիներին ու նրանց երջանիկ մանկություն տալ»,- ընդգծեց դերասանը:
Ի դեպ, Յուրիի խոսքով, ինքը հոգատար հայրիկ է.
«Կենցաղային հարցերում մեզ շատ է օգնում մայրիկս, բայց ես հոգատար եւ գլուխ չպահող հայրիկ եմ, սիրով զբաղվում եմ մանկական հարցերով: Քանի որ աշխատանքս երեկոյան է սկսվում, օրվա առաջին ժամերն անցկացնում եմ երեխայի ու Անուշի հետ»,- նկատեց նա:
Անդրադառնալով աշխատանքային ծրագրերին՝ Յուրի Իգիթխանյանը նշեց.
«Գործնական ծրագրերը շատ են, պետք է ակտիվ աշխատել, որ փոքրիկները լավ ապրեն: Այս շրջանում նկարահանվում եմ հեռուստասերիալում, գեղարվեստական ֆիլմում, սակայն նույն ակտիվության մասին չեմ կարող խոսել թատերական կյանքի մասին, քանի որ թատրոնը դեռեւս չկա իմ կյանքում: Ինձ համար ամենակարեւորն այն է, որ առողջություն լինի, մնացած ամեն ինչ դրանից է կախված»:
