Պավլիկ Մանուկյանին պատգարակով տեղափոխել են դատարան. որոշվում է նրա կալանքի հարցը

News.am-ը գրում է.

«Սասնա ծռերի» անդամ Պավլիկ Մանուկյանին այսօր` հուլիսի 31-ին, «Շտապօգնության» մեքենայով պատգարակով Երեւանի «Էրեբունի» հիվանդանոցից տեղափոխել են դատարան: Լրագրողների հետ զրույցում Պավլիկ Մանուկյանի պաշտպան Ինեսսա Պետրոսյանը նշել է, որ քիչ անց քննվելու է Պավլիկ Մանուկյանի կալանքի հարցը. «Պավլիկ Մանուկյանը գտնվում է դատարանում, նրան պատգարակով են տեղափոխել դատարան: Նախաքննական մարմինը միջնորդել է նրա նկատմամաբ որպես խափանման միջով ընտրելերկամսյա կալանքը»,-ասել է նա:

Նշենք, որ Պավլիկ Մանուկյանը գտնվում էր Երեւանի «Էրեբունի» հիվանդանոցում:

Ավելի վաղ առողջապահության նախարարության մամուլի ծառայությունիցNEWS.am-ին հայտնել էին, թե Պավլիկ Մանուկյանն ինքնուրույն է շնչում, սակայն դեռեւս գտնվում է Վերակենդանացման բաժանմունքում, քանի որ բուժման անհրաժեշտություն կա այնտեղ:

Հիշեցնենք, ըստ ոստիկանության հաղորդագրության, Պավլիկ Մանուկյանն եւ նրա որդին ոտքերի հատվածում հրազենային վիրավորում են ստացել ՊՊԾ գնդում տեղի ունեցած փոխհրաձգության հետեւանքով։ Հուլիսի 27-ին Պավլիկ Մանուկյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասով, որը սահմանում է շենքեր, շինություններ, տրանսպորտի, հաղորդակցության կամ կապի միջոցներ զավթելը և 235-րդ հոդվածով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը։

Ըստ մեղադրանքի` մի դեպքում նախատեսվում է  6-12, մյուս դեպքում 3-8 տարվա ազատազրկում: