Վրաստանի վարչապետը վստահ է՝ «Վրացական երազանքը» կհաղթի գալիք ընտրություններում

Վրաստանում հոկտեմբերին կալանալիք խորհրդարանական ընտրություններում կհաղթի «Վրացական երազանքը»: Այս մասին հայտնել է Վրաստանի վարչապետ, «Վրացական երազանք» կուսակցության ղեկավար Գեորգի Կվիրիկաշվիլին:

Նրա խոսքով, 2012-ին, այն բարդագույն իրավիճակում, երբ վճռվում էր Վրաստանի ճակատագիրը, վրացի ժողովուրդը Բիձինա Իվանիշվիլու հետ միասին զգալի հաղթանակի է հասել ու «այդ հաղթանակը այն ժամանակ նշանակում էր իրական հաղթանակ հանուն մեր երկրի լավ ապագայի», հայտնում է «ԻնտերփրեսՆյուզը»: «Ու այս ընտրություններում մենք միասին ենք հաղթելու: Հաղթելու է «Վրացական երազանքը», որը ազատություն է բերել, հաղթելու է, որպես միակ ուժ, որը այսօր կարող է համախմբել ժողովրդին, նպաստել երկրի արագ զարգացմանը ու ժողովրդին բարեկեցություն բերել: Նորից միավորվենք, ընկերներ, հանուն մեր ավելի լավ ապագայի: Պետք է Վրաստանի ներսում վերջ տալ պառակտմանը ու փոխադարձ թշնամանքին: Մենք չենք կարող մեզ թույլ տալ երկու, երեք, չորս կամ ավելի ճամբարների բաժանվելու ճոխությունը: Մենք մեկ ընդհանուր խնդիր ունենք՝ միավորել մեր երկիրը, բարեկեցություն բերել յուրաքանչյուր ընտանիքի ու ոչ մի դեպքում այդ խնդիրը չի կատարվի, եթե մենք մասնատված լինենք: Դրա համար էլ եւս մեկ անգամ ասում եմ՝ «Վրացական երազանքը» միավորված ուժ է, այն ձգողության կենտրոնը, որտեղ բոլոր մարդիկ, ովքեր ուզում են մեր երկրի համար ավելի լավ ապագա, պետք է կողք- կողքի կանգնեն»,- հայտնել է Կվիրիկաշվիլին: