Կանեփ աճեցնելու եւ մարիխուանա պատրաստելու համար 3 տարի կարող է անազատության մեջ լինել

Արարատի եւ Վայոց ձորի մարզերի ընդհանուր իրավասության դատարանում հարուցվել է քրեական գործ՝ մարիխուանա տեսակի թմրամիջոց պատրաստելու եւ պահելու փաստի առթիվ:

Ըստ Դատական տեղեկատավական համակարգի՝ Հայկ Ավետիսյանին մեղադրանք է առաջադրվել այն բանի համար, որ նա 2015թ. աշնանն իր հողամասում իր կողմից աճեցված կանեփի բույսերից, առանց իրացնելու նպատակի՝ տերեւներ եւ գլխիկներ պոկելով իր օգտագործման համար պատրաստել է 7.33 գրամ հաստատուն քաշով մարիխուանա տեսակի թմրամիջոց:

Այնուհետեւ թմրամիջոցն առանձին փաթեթներով պահել է իր վարած «BMW» մակնիշի ավտոմեքենայի սրահում, ինչպես նաեւ իր հագին եղած վերնազգեստի գրպանում, որը սակայն այս տարվա փետրվարին հայտնաբերվել եւ վերցվել է ոստիկանության Մասիսի բաժնի աշխատակիցների կողմից կատարված՝ Ավետիսյանի ավտոմեքենայի զննության եւ նրա անձնական խուզարկության ժամանակ:

Հայկ Ավետիսյանը մեղադրվում է Քրեական օրենսգրքի 268-րդ հոդվածի (Թմրամիջոցների կամ հոգեներգործուն նյութերի ապօրինի շրջանառությունն առանց դրանք իրացնելու նպատակի) երկրորդ մասի երկրորդ կետի հատկանիշներով: Այս հոդվածը նախատեսում է առավելագույնը երեք տարի ժամկետով ազատազրկում:

Ավետիսյանին ստորագրությամբ ազատ են արձակել:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի`օրինական ուժի մեջ մտած դատավճռով:

Քրիստինա Տեր-Մաթեւոսյան