Պետբյուջեից՝ սպորտին. Մասնակցությունը Ռիո 2016-ին Հայաստանի համար կարժենա 195 միլիոն դրամ

ՎԵՐԼՈՒԾԱԿԱՆ 3 Օգոստոս, 2016 16:37

Ընդամենը մեկ 2 օրից` օգոստոսի 5-ից Բրազիլիայի Ռիո դե Ժանեյրո քաղաքում կմեկնարկեն հերթական Օլիմպիակա խաղերը, որին մեր երկիրը ներկայացված կլինի 8 մարզաձևի 33 մարզիկներով: Այս գերխոշոր ստուգատեսը կարևոր հարթակ է նաև կատարված աշխատանքները գնահատելու համար, իսկ պետության կողմից իրականացված աշխատանքը նախ և առաջ սպորտին հատկացված ուշադրությունն է, համապատասխան ֆինանսավորումն ու սպորտի զարգացման ու մասսայականացմանը նպաստելը:

Հայաստանի Հանրապետության 2016 թվականի պետական բյուջեի մասին օրենքի համաձայն` պետական բյուջեից տարբեր սպորտաձևերին ուղղված ընդհանուր ֆինանսավորումը կազմել է շուրջ 930 մլն դրամ:

Ֆինանսավորման ամենամեծ մասը բաժին է հասել Ըմբշամարտի ֆեդերացիային և կազմել 220 մլն դրամ: 2-րդ տեղում է Հայաստանի ծանրամարտի ֆեդերացիան` 165 մլն դրամ ընդհանուր ֆինանսավորման ծավալով: Լավագույն եռյակը սահմանափակում է Հայաստանի բռնցքամարտի ֆեդերացիան` 110 միլիոն դրամ ֆինանսավորման ծավալով:

Վերադառնալով Ռիոյի Օլիմպիական խաղերին` պետք է նշենք, որ այս ստուգատեսին մասնակցելու համար պետբյուջեից հատկացվել է 189 միլիոն 241 հազար դրամ, ևս 6 միլիոն 394 հազար դրամ էլ հատկացվել է մարզական պատվիրակություների մասնակցության համար: Այսպիսով, Ռիոյի օլիմպիական խաղերին մեր երկրի պատշաճ մասնակցությունը ընդհանուր առմամբ պետության համար արժեցել է շուրջ 195 միլիոն դրամ: Հուսանք, որ մեր օլիմպիականներն իրենց վստահ կդրսևորեն միջազգային այս կարևոր ստուգատեսում և մեզ ուրախանալու և հպարտանալու բազմաթիվ առիթներ կպարգևեն:

Հայկ Բեջանյան, Past.am վերլուծաբան