Տրանսպորտային բեռնափոխադրումների ծավալը կազմել է 4683 հազար տոննա

ՎԵՐԼՈՒԾԱԿԱՆ 4 Օգոստոս, 2016 11:42

Ցանկացած երկրի տնտեսության զարգացման խթանիչ ուժն անկասկած տրանսպորտային համակարգն է: Հենց սրանով է պայմանավորված այն հանգամանքը, որ առավել բարձր տնտեսական զարգացվածության մակարդակ ունենում են այն երկրները և շրջանները, որոնք գտնվում են տրանսպորտային խոշոր խաչմերուկներում: Այս առումով բացառություն չէ նաև Հայաստանը, սակայն չնայած այն հանգամանքին, որ մեր երկիրը գտնվում է տնտեսական խոշոր խաչմերուկում, հարևան երկրների հետ լարվածությամբ պայմանավորված, մեր երկիրը տրանսպորտային զարգացած երկիր համարել չենք կարող: Այստեղ իր ազդեցությունն ունի նաև աշխարհագրական կառուցածքը: Հայաստանը լեռնային երկիր է, որտեղ բավական բարդ է տրանսպորտային ընդլայնված ցանց ստեղծելը: Առավել բարդ է երկաթուղային ցանցի ստեղծումը, որը երբեմն նաև դառնում է անհնար: Հենց այս հանգամանքներն էլ պայմանավորում են մեր երկրում ապրանքաշրջանառության ծավալները ու դրա բաշխումը տրանսպորտային տեսակների մեջ:

Անցած տարվա ընթացքում մեր երկրում իրականացվել է 4683 հազար տոննա ապրանքաշրաջանառություն, որը գումարային արտահայտմամբ կազմել է 4845 մլն ԱՄՆ դոլար: Կառուցվածքային մակարդակում առավել խոշոր մասնաբաժինը ավտոմոբիլային փոխադրումներինն է: Ավտոմոբիլային փոխադրումներին է բաժին ընկել է ընդհանուր ծավալի 55%-ը, որը թվային արտահայտությամբ կազմել է 1478 հազար տոննա կամ 2652 մլն ԱՄՆ դոլար:

Երկաթուղային տրանսպորտի միջոցով իրականացված բեռնափոխադրումները կազմել են ընդհանուր ծավալի 21 %-ը՝ 1221 հազ տոննա, որը գումարային արտահայտությամբ կազմել է 1016 մլն ԱՄՆ դոլար:

Օդային փոխադրումներին բաժին է ընկնում մեր երկրի առևտրաշրջանառության 11 %-ը՝ 5 հազար տոննա ծավալով և 549 մլն ԱՄՆ դոլար գումարային արտահայտությամբ:

Վերջին տրանսպորտային տեսակը, որը կիրառելի է մեր երկրի տարածքում, ստացիոնարն է, որը հիմնականում ներառում է խողովակաշարային և էլ. հոսանքի փոխադրումները: Այս ճյուղին բաժին է ընկնում փոխադրումների 13 %-ը` 627 մլն ԱՄՆ դոլար ընդհանուր արժողությամբ:

Ամփոփելով նշենք, որ առավել զարգացած երկրներում փոխադրումների առանցքային բաղադրիչը բաժին է ընկնում ծովային և երկաթուղային տրանսպորտին: Դրանցից առաջինը մեր երկրում բացակայում է` ծով ելք չունենալով պայմանավորված, իսկ երկաթուղային տրանսպորտի ցանցն էլ թերի է` ելնելով աշխարհագրական ռելիեֆի առանձնահատկություններից: Արդյունքում` հիմնական տրանսպորտային փոխադրամիջոցը շարունակում է մնալ ավտոմոբիլայինը:

Հայկ Բեջանյան, Past.am վերլուծաբան