Ռիոյում Օլիմպիական խաղերի բացման արարողությանը ներկա կլինեն պետությունների ու կառավարությունների 45 ղեկավարներ

Ռիո դե Ժանեյրոյում 2016 թվականի ամառային Օլիմպիական խաղերի բացման արարողությանը ներկա կլինեն պետությունների ու կառավարությունների 45 ղեկավարներ, տեղեկացնում Է«Արմենպրես»-ը՝ հղում անելով «Ֆրանսպրես» գործակալությանը:

Արարողությունն օգոստոսի 5-ին կկայանա «Մարականա» մարզադաշտում: Հաղորդվում Է, որ 45 թիվը հուլիսի վերջին հրապարակվել Էր Բրազիլիայի արտաքին գործերի նախարար Ժոզե Սերրայի կողմից, բայց պաշտոնապես չԷր հայտնվում անվտանգության նկատառումներով:

Պեկինի 2008 թվականի Խաղերի բացման արարողությանը ներկա են եղել պետությունների ու կառավարությունների առնվազն 80 ղեկավարներ, Լոնդոնի 2012 թվականի Խաղերին՝ 69, Սոչիի 2014 թվականի Խաղերին՝ 50:

Ավելի վաղ հաղորդվել է, որ լատինամերիկյան պետություններից Խաղերի բացման արարողությանն իրենց ներկայությունն արդեն հաստատել են Արգենտինայի եւ Պարագվայի նախագահները: Չինաստանը 2016-ի Օլիմպիադա կուղարկի միայն փոխվարչապետի, չնայած Բրազիլիայի հետ ունեցած սերտ առեւտրական հարաբերություններին: Եվրոպական պետությունների ղեկավարներից կմասնակցեն Գերմանիայի, Ֆրանսիայի եւ Պորտուգալիայի նախագահները:

ԱՄՆ-ի պատվիրակությունը կգլխավորի պետքարտուղար Ջոն Քերին:

Հուլիսի 25-ին Վլադիմիր Պուտինի մամուլի քարտուղար Դմիտրի Պեսկովը հայտարարել է, որ Ռուսաստանի նախագահը չի պլանավորում մասնակցել Օլիմպիադայի բացմանը, որն օգոստոսի 5-ին կայանալու է «Մարականա» մարզադաշտում:

31-րդ ամառային Օլիմպիական խաղերը տեղի կունենան օգոստոսի 5-ից մինչեւ 21-ը, հաղորդել է ՏԱՍՍ-ը: