Նորաձեւությունն ըստ հորոսկոպի նշանի

Յուրաքանչյուր մարդ անհատականություն է, եւ նորաձեւության միտումներին հետեւելիս պետք է հաշվի առնել անհատի առանձնահատկությունները: Դրանցից մեկն էլ կարող է լինել այն, թե ինչ կենդանակերպի նշանի տակ է ծնվել տվյալ մարդը: 

ԽՈՅԵՐ

Հորոսկոպի բոլոր նշաններից խոյերն ամենալավն են ընկալում նորաձեւության նորարարությունները: Այս համաստեղության տակ ծնվածներն առաջին հերթին հագուստ ընտրում են գույնով: Դա կարող է լինել կարմիրի բոլոր երանգները` բաց վարդագույնից, մուգ շականագագույնից մինչեւ վառ եւ մուգ կարմիր: Խոյերը չեն սիրում մռայլ գույներ:

ՑՈՒԼԵՐ

Ցուլերը զգեստների հարցում սկզբունքային են: Քիչ լինի, բայց՝ որակով:  Նրանք հրաշալի զգում են կտորը, դրա կառուցվածքը: Ցուլերն առաջնորդվում են ոչ թե նորաձեւության վերջին միտումներով, այլ նրանով, ինչը երբեք դուրս չի գալիս նորաձեւությունից: Ցուլ կանայք նախընտրում են Վեներայի գույները` վարդագույնը, երկնագույնը, ինչպես նաեւ բոլոր հյութեղ գույները, իսկ տղամարդիկ` մուգ կանաչն ու մուգ շագանակագույնը:

ԵՐԿՎՈՐՅԱԿՆԵՐ

Երկվորյակները գնում են պատահական հագուստ եւ հեշտությամբ այն դեն են նետում: Երկվորյակների ոճը չեզոք է: Այդ հիմնականում սպորտային հագուստի հավաքածու է. ջինս, շապիկներ, ժիլետներ: Նրանց համար կարեւոր են ոչ թե գունային գամման կամ կտորի որակը, այլ թեթեւությունն ու առաձգականությունը:

ԽԵՑԳԵՏԻՆՆԵՐ

Խեցգետինների համար կարեւոր են հագուստի մաքրությունը եւ հարմարավետությունը, այդ պատճառով նրանք նախընտրում են բնական նյութերից պատրաստված հագուստ: Կին խեցգետիններին ամենից շատ սազում են կանաչի բոլոր երանգները, սեւը, շագանակագույնը:

ԱՌՅՈՒԾՆԵՐ

Առյուծները հիանալի տիրապետում են հագուստ ընտրելու արվեստին: Նրանք սիրում են վառ, բայց ոչ ճչացող գույներ: Կին Առյուծներն ընտրում են դեղին, նարնջագույն, ոսկեգույն, սպիտակ գույներն ու դրանց համադրությունները, տղամարդիկ նախընտրում են հյութեղ համադրություններ` մուգ կապույտ, բալագույն, սեւի ու սպիտակի համադրություն եւ այլն: Առյուծները հետեւում են նորաձեւությանը, սակայն հագնում են այն, ինչ իրենց է սազում:

ԿՈՒՅՍԵՐ

Բոլոր նորաձեւ առաջարկներից Կույսերն ընտրում են ամենապրակտիկը` ամեն առիթի համար: Ունենալով փոքր զգեստապահարան՝ նրանք կարողանում են միշտ նորովի ներկայանալ: Կույսերի համար կարեւոր է, թե ինչպես է կարված հագուստը: Կույսերին շատ են սազում ծիածանի գույները:

ԿՇԵՌՔՆԵՐ

Կշեռքները ծայրահեղությունների հետեւից չեն ընկնում, եւ նրանց հագուստը միշտ հարմոնիկ տպավորություն է թողնում:  Կշեռքները հետեւում են ոսկե միջինի կանոնին, նրանք ունեն չափի զգացողություն: Կշեռք կանայք սիրում են տաբատ հագնել, ինչպես նաեւ տղամարդու աքսեսուարներ` փողկապ, գլխարկ: Այս համաստեղության տակ ծնվածները կարողանում են գրավիչ լինել՝ հագուստի համար նվազագույն ծախս անելով:

ԿԱՐԻՃՆԵՐ

Նորաձեւությունը կարիճների համար իրենց սեքսուալությունն ընդգծելու լավագույն միջոցն է: Կին կարիճները սիրում են մարմինը գրկող, կազմվածքն ընդգծող հագուստ, բոլոր տեսակի բացվածքները, կտրվածքները: Տղամարդ կարիճները երբեմն կարող են ագրեսիվ ոճ ունենալ` հագնել կաշվե տաբատ, նեղ բլուզներ եւ այլն: Կարիճները հաճախ ձգտում են դասական ոճի: Նրանք նաեւ սիրում են հին հագուստը վերածել նորի ու այն ներկայացնել նորովի:

ԱՂԵՂՆԱՎՈՐՆԵՐ

Լինել նորաձեւ՝ Աղեղնավորների համար նշանակում է ինտեգրվել հասարակությանը: Աղեղնավորների այն տեսակը, որը ձգտում է սիրված լինել հասարակության մեջ, գնում է թանկարժեք եւ բրենդային հագուստ՝ անկախ այն բանից, սազո՞ւմ է այն իրեն, թե՞ ոչ: Մյուս մասը՝ հակառակը, ընդհանրապես չի հետեւում նորաձեւությանը: Նրանք չեն ձգտում իրենց արժանիքները ցուցադրել հագուստի միջոցով: Այդպիսի Աղեղնավորները երկար ժամանակ միեւնույն հագուստն են հագնում եւ դժվար են հրաժարվում սիրելի զգեստներից: Աղեղնավորները սիրում են ակումբային ոճը: Այս համաստեղության տակ ծնված անձնանց սազում են մուգ, հագեցած գույները` մորեգույն, մուգ կարմիր, մանուշակագույն:

ԱՅԾԵՂՋՅՈՒՐ

Այծեղջյուրները սովորաբար ընտրում են այնպիսի հագուստ, որն արդեն հայտնի է ու փորձված: Փայլն ու շքեղությունը նրանց համար գռեհիկ է, այդ պատճառով նրանց հագուստի մեջ ոչ մի ավելորդ բան չկա: Կին Այծեղջյուրները սիրում են ձեռագործ ժանյակներ, գործվածքներ: Այծեղջյուրները հաճախ են մուգ գույների հագուստ հագնում` մուգ մոխրագույն, սեւ, կապույտ:

ՋՐՀՈՍ

Ջրհոսներին գրավում է վառ ու անսովոր ամեն բան, այդ թվում եւ նորաձեւության մեջ: Հագուստ ընտրելիս թե’ կին, թե’ տղամարդ Ջրհոսներն առաջնորդվում են ներքին զգացողությամբ: Նրանց համար հագուստն անհատականությունն ընդգծելու եւս մեկ միջոց է: Ջրհոսի անհատական ոճը կարելի է բնութագրել այսպես. գունային հանգիստ գամմա` արծաթա-մոխրագույն, երկնագույն: Պետք է նշել, որ Ջրհոսները հավատարիմ են մնում իրենց ոճին:

ՁԿՆԵՐ

Հագուստի մեջ Ձկների համար կարեւոր է ոչ թե արտաքին տեսքը, այլ թաքնված հմայքը: Առօրյայում նրանք հասարակ հագուստ են հագնում. միայն թե տաք ու հարմարավետ լինի: Ձկները հազվադեպ են ընդունում սահմանափակումներ եւ ամենից շատ չեն սիրում համազգեստներ: Գույների առումով նախընտրում են կապույտի, երկնագույնի, մանուշակագույնի, վարդագույնի ու կանաչի երանգները: