Գերմանացի դիվանագետը Ցեղասպանության ճանաչումը Գերմանիայի մեղսակցության գիտակցում է համարում

Մոսկվայի հայ համայնքի պատվիրակությունը Մոսկվայում Գերմանիայի դեսպանությունում հանդիպում է ունեցել ՌԴ-ում Գերմանիայի գործերի ժամանակավոր հավատարմատար Անդրեաս Մայտցների հետ: Հանդիպմանը մասնակցել են Մոսկվայի հայ համայնքի ներկայացուցիչներ Յուրի Նավոյանը, Էդիկ Դանիելյանը և Ռոբերտ Աբաղյանը: Հանդիպմանը ներկա է գտնվել  նաև դեսպանության քաղաքական բաժնի խորհրդական Ուտե Կատչ-Էգլին:

Հայ համայնքի ներկայացուցիչները դեսպանություն են այցելել ի նշան երախտագիտության Գերմանիայի Բունդեսթագի կողմից Հայոց ցեղասպանության ճանաչման բանաձևի ընդունման համար: Պատվիրակության անունից Յուրի Նավոյանը Բունդեսթագի բանաձևը գնահատել է իբրև ցեղասպանության հանցագործության և ժխտողականության դեմ պայքարի կարևոր քայլ, միաժամանակ ընդգծելով, որ Գերմանիայի կողմից Հայերի ցեղասպանության ճանաչման առանձնահատկությունն այն է, որ այդ երկիրը Առաջին աշխարհամարտում Թուրքիայի դաշնակիցն էր: Այս քայլով Գերմանիան դրական օրինակ է հանդիսանում Թուրքիայի համար: Մյուս օրինակն էլ այն է, որ Գերմանիան ժամանակին կարողացել է վերանայել իր պատմությունը, ճանաչել է հրեաների ցեղասպանությունը և հատուցում է դրա համար:

Հայ համայնքի ներկայացուցիչները ուշադրություն են հրավիրել այն բանին, որ Բունդեսթագի բանաձևը կոչ է անում Թուրքիային առերեսվելու իր պատմությանը և այդ ճանապարհով հարաբերություններ հաստատել Հայաստանի և հայ ժողովրդի հետ: Հայ պատվիրակները անդրադարձել են նաև Հարավային Կովկասի տարածաշրջանում Ադրբերջանի ռազմատենչ քաղաքականության պայմաններում խաղաղության և կայունության պահպանման ջանքերին և ԵԱՀԿ Մինսկի խմբի շրջանակներում բանակցության գործընթացին: Այդ իմաստով հիշատակվել են նաև Գերմանիայի` իրբրև ներկայումս ԵԱՀԿ-ում նախագահող երկրի ջանքերը և այս ամռանը Գերմանիայի արտգործնախարարի այցը տարածաշրջան: Ընդգծվել է, որ այցի ժամանակ արտգործնախարար Վալտեր Շտայնմայերը հանդիպել է նաև ԼՂՀ նախագահ Բակո Սահակյանին, ինչը իրավիճակը անմիջականորեն և ամբողջությամբ պատկերացնելու հնարավորություն է տալիս:

Գերմանիայի գործերի ժամանակավոր հավատարմատար Անդրեաս Մայտցները հայ համայնքի պատվիրակությանը շնորհակալություն է հայտնել այցի համար: Նա նշել է, որ Բունդեսթագի բանաձևին նախորդել են երկար ու թեժ քննարկումներ գերմանական քաղաքական կուսակցությունների միջև, ինչը ի վերջո հանգեցրել է ընդհանուր համաձայնության: Գերմանացի դիվանագետը բանաձևի ընդունումը գնահատել է իբրև Գերմանիայի մեղսակցության գիտակցում, ընդգծել, որ իր երկիրը պատմությանը բաց նայելու կողմնակից է և նույն կերպ վարվելու կոչ է անում Թուրքիային: Չպետք է տաբու լինի որևէ հարցի նկատմա մբ, իրենք խրախուսելու են Թուրքիայի հասարակությունում Հայոց ցեղասպանության վերաբերյալ քննարկումներին, իսկ դա միայն կնպաստի ժողովուրդների հաշտությանը:

Նա ավելացրել է, որ  ԵԱՀԿ նախագահող երկիր Գերմանիան շարունակելու է ջանքեր գործադրել Մինսկի խմբի ձևաչափով բացառապես խաղաղ միջոցներով ղարաբաղյան խնդրի կարգավորմանը հասնելու համար: Գերմանացի դիվանագետի խնդրանքով Յուրի Նավոյանը` որպես Հայոց ցեղասպանության 100–րդ տարելիցի համառուսաստանյան հանձնաժողովի համակարգող, ներկայացարել է ցեղասպանության թեմայով Ռուսաստանում իրականացվող ծրագրերը: Նա նաև անդրադարձել է ցեղասպանության հանցագործության կանխարգալմանն ուղղված այն աշխատանքներին, որը տանում է Հայաստանի Հանրապետությունը միջազգային ասպարեզում: Այդ իմաստով և համահայկական միասնականության ապահովման համար նա ընդգծվել է ՀՀ նախագահ Սերժ Սարգսյանի գլխավորությամբ Հայոց ցեղասպանության 100–րդ տարելիցի պետական հանձնաժողովի գործունեության նշանակությունը: Հանդիպման ժամանակ խոսվել է նաև հայ-գերմանական հարաբերությունների,  մի շարք ծրագրերի մասին: