Ժոզե Մոուրինյոն հավատում է Պրեմիեր լիգայի նոր մրցաշրջանում իր թիմի հաղթանակին

Անգլիական «Մանչեսթեր Յունայթեդ»-ի գլխավոր մարզիչ Ժոզե Մոուրինյոն Պրեմիեր լիգայի մեկնարկին ընդառաջ հավատում է, որ իր թիմին կհաջողվի հաղթել առաջնությունը:

Ինչպես հաղորդում է «Արմենպրես»-ը` վկայակոչելով անգլիական ակումբի պաշտոնական կայքը, Մոուրինյոն նշել է, որ իրենք զգում են, որ առաջնության հաղթողի ֆավորիտներից են: «Մենք գիտենք, որ մյուս թիմերն էլ ունեն նույն ամբիցիաները: Եթե այնպես ստացվի, որ մրցաշրջանի ավարտին ոչ թե մենք լինենք չեմպիոն, այլ մեկ ուրիշ թիմ, սարսափելի բան չի լինի, սա ֆուտբոլ է: Այս պահին մենք այլ կերպ չենք կարող խոսել: Մենք պատրաստվում ենք կռիվ տալ տիտղոսի համար»,- ասել է պորտուգալացի մասնագետը:

Մոուրինյոն անդրադարձել է նաև հարցին, թե ինչպես է պատրաստվում վերջ դնել «Մանչեսթեր Յունայթեդ»-ի երկրպագուների հիասթափությանը վերջին տարիներին ակումբի գրանցած ցածր արդյունքների պատճառով: «Պրոֆեսիոնալիզմի միջոցով: Մենք այստեղ չենք եկել զվարճանալու կամ լավ եղանակը վայելելու համար: Մենք այստեղ ենք աշխատելու և ակումբին ամեն ինչ տալու համար»,- ասել է նա:

Նա խոսել է նաև Պրեմիեր լիգայի առաջին տուրում «Բորնմութ»-ի դեմ կայանալիք խաղից: Պորտուգալացի մասնագետն ընդգծել է, որ իրենց դժվար խաղ է սպասվում, քանի որ մրցակիցը լավ թիմ ունի և կայուն խաղ է ցուցադրում, իսկ կազմի ֆուտբոլիստները շատ լավ են միմյանց ճանաչում և հասկանում: