Հ. Հակոբյանի որդին ու եղբայրը շոկային վիճակից դուրս են եկել, պայթյունից մյուս տուժածն արդեն հիվանդասենյակում է

Արմավիրում նախկին պատգամավոր Հակոբ Հակոբյանին պատկանող գազալցակայանի պայթյունից տուժած Արմեն Ռաֆիկի Հակոբյանը (Հակոբ Հակոբյանի եղբայրը ) և Արմեն Հակոբի Հակոբյանը (Հակոբ Հակոբյանի որդին) շոկային վիճակից դուրս են եկել, սակայն եղբոր՝ Արմեն Հակոբյանի վիճակը շարունակում է մնալ ծանր, իսկ երրորդ տուժածը՝ Արթուր Գասպարյանն արդեն տեղափոխվել է հիվանդասենյակ:

Այս մասին Tert.am-ին հայտնեցին ՀՀ առողջապահության նախարարության լրատվական ծառայությունից՝ հղում անելով Ճառագայթային բժշկության և այրվածքների հանրապետական գիտական կենտրոնի Անզգայացման և վերակենդանացման բաժանմունք տվյալներին:

Հիշեցնենք, որ Արմավիրի մարզի Զվարթնոց գյուղի գազալցակայաններից մեկում տեղի ունեցած պայթյունի հետևանքով տուժել էին գազալցակայանի աշխատակից Արթուր Գասպարյանը, գազալցակայանի սեփականատեր, նախկին պատգամավոր Հակոբ Հակոբյանի որդին՝ Արմեն Հակոբյանը և եղբայրը՝ Արմեն Հակոբյանը, ովքեր գտնվում են Այրվածքաբանական կենտրոնում:

Հակոբ Հակոբյանն էլ Tert.am-ին հայտնեց, որ որդու վիճակը կայունանում է, եղբորինը`մնում նույնը:

Հարցը, թե հայտարարվում է, որ իրեն պատկանող գազալցակայանը տեխնիկական փորձաքննություն չէր անցել, ինչի համար տուգանվել էր մեկ միլիոն դրամով, բարկացրեց Հակոբ Հակոբյանին, ով կրկնեց այն, ինչ մինչ այդ ասել էր Տարածքային կառավարման նախարար Արմեն Երիցյանի հասցեին:

«Ես ասել եմ, որ ով ինձ հարց կտա, բացի տուժածների առողջությունից, թուղթ, փաստաթուղթ, փող, գող, բիզնես, ես կասեմ, որ նրանք անհասկացող մարդիկ են, կապիկ ու մի բան էլ ավելին: Մենք էդ մարդկանց վատ աչքով ենք նայում»,-ասաց Հակոբ Հակոբյանը` ցած դնելով հեռախոսը: