Վերին Գետաշենում ներդրված պետական ծրագրերը նպաստում են անասնապահության զարգացմանը

Գեղարքունիքի մարզի Վերին Գետաշեն գյուղում ՀՀ կառավարության կողմից իրականացվող «Համայնքների գյուղատնտեսական ռեսուրսների կառավարման եւ մրցունակության ծրագրի» կողմից կատարված ներդրումների եւ համայնքի  համաֆինանսավորման հաշվին  այժմ ընթացքի մեջ է ամառային արոտավայր համարվող Քարաձիում խոշոր եղջերավոր անասուններ ի փարախի եւ անասնապահի տնակի կառուցումը:Նույն ծրագրի շրջանակներում նորաստեղծ գյուղատնտեսական կոոպերատիվին տրամադրված 4 «Բելառուս» մակնիշի տրակտորները եւ նրանց ամրացված գյուղգործիքներն այս օրերին արդյունավետ են ծառայում գյուղացիական տնտեսությունների կարիքներին խոտի բերքահավաքի այս եռուզեռի ընթացքում:

Ինչպես «Արմենպրես»-ին տեղեկացրեց Վերին Գետաշենի գյուղապետ Ռուբիկ Ղուկասյանը, ծրագրի ներդրման շնորհիվ Վերին Գետաշենում արդեն նկատելի զարգացում է ապրում անասնապահությունը, իսկ դրա ավարտից հետո արդյունքներն ավելի խոսուն կլինեն:«Նախորդ տարում «Համայնքների գյուղատնտեսական ռեսուրսների կառավարման եւ մրցունակության ծրագրի» կողմից կատարված ներդրումների շնորհիվ Վերին Գետաշենում ջրարբիացվեց 400 հեկտար արոտավայր՝ 3 խմոցների եւ 3 կիլոմետր երկարության ջրագծի կառուցմամբ:

Այժմ նույն ծրագրի շրջանակներում 19 միլիոն դրամի ներդրմամբ ամառային արոտավայրում կառուցվում է խոշոր եղջերավորների փարախ եւ անասնապահի տնակ, որի շինարարությունը նախատեսվում է ավարտել այս տարվա սեպտեմբերի վերջերին: Նույն ծրագրով ձեռք բերված տեխնիկան նպաստել է, որպեսզի մեզ մոտ գարնանացանի եւ անասնակերի բերքահավաքի ժամանակ գյուղացիական տնտեսություններին ծառայությունները մատուցվեն գործող գներից 20 տոկոսի չափով էժան գներով: Նախորդ տարվա համեմատ մեզ մոտ անասնագլխաքանակն աճել է մոտ 20 տոկոսով:Այժմ մեզ մոտ հաշվառված է մինչեւ 3 հազար գլուխ ոշոր եղջերավոր անասուն:Մեր ունեցած հողային ռեսուրսները մեզ հնարավորություն են տալիս՝ մոտ երեք անգամ ավելացնել անասնագլխաքանակը: Կարծում եմ, որ կկարողանանք աստիճանաբար զարկ տալ անասնապահությանը եւ այն դարձնել եկամտաբեր զբաղմունք, ինչի համար ունենք բավարար պայմաններ»-նշեց համայնքի ղեկավարը:

Խոսրով Խլղաթյան