Էրդողանի այցն Իրան կարող է դառնալ Սիրիայի գծով կոալիցիայի ձեւավորման սկիզբ. «Ալ Հայաթ»

Թուրքիայի նախագահ Ռեջեփ Թայիփ Էրդողանը պատրաստվում է եկող շաբաթ այց կատարել Իրան, ինչը կարող է դառնալ Սիրիայի գծով Անկարայի, Մոսկվայի եւ Թեհրանի միջեւ կոալիցիայի ձեւավորման սկիզբ:

Այս մասին գրում է միջարաբական «Ալ Հայաթ» թերթը` հղում կատարելով սեփական աղբյուրներին:

Օգոստոսին Իրանի արտաքին գործերի նախարար Ջավադ Զարիֆն այցելել էր Թուրքիա, որտեղ, մասնավորապես, հայտարարել էր, որ Իրանը, Ռուսաստանը եւ Թուրքիան հանդիսանում են տարածաշրջանային կարեւոր խաղացողներ, որոնց անհրաժեշտ է համագործակցել:

Դրանից հետո Իրանի փոխարտգործնախարար Հոսեյն Ջաբերի Անսարին հայտարարել էր, որ Թեհրանը եւ Անկարան համաձայնվել են շարունակել տարածաշրջանային հարցերով բանակցությունները, եւ ինքը կայցելի Անկարա` այդ հարցերը քննարկելու համար: 

Իր հերթին Թուրքիայի վարչապետ Բինալի Յըլդըրըմն առաջարկել է Սիրիայում հակամարտության կարգավորման փուլային պլան:

Ավելի վաղ ՌԴ ԱԳՆ ղեկավարի տեղակալ, ՌԴ նախագահի Մերձավոր Արեւելքի եւ Աֆրիկայի երկրների գծով հատուկ ներկայացուցիչ Միխայիլ Բոգդանովը «Ինտերֆաքս»-ին հայտարարել էր, որ Ռուսաատանը, Իրանը եւ Թուրքիան կարող են եռակողմ ձեւաչափով բանակցություններ վարել Սիրիայում իրավիճակի քննարկման համար:

«Ռուսաստանը եւ Իրանը Թուրքիայի հետ պայմանավորվել են երկկողմանի ակտիվ խորհրդակցություններ անցկացնել Սիրիայի եւ Մերձավոր արեւելքի գծով: Դրա հետ կապված թուրքական գործընկերների հետ խորհրդակցությունները կարող են վերաճել արտաքին քաղաքական գերատեսչությունների միջեւ եռակողմ հանդիպումների, դա միանգամայն հնարավոր է», -Իրանի ԱԳՆ-ի ղեկավար Ջավադ Զարիֆի հետ բանակցությունների արդյունքներով հայտարարել է նա:

Միխայիլ Բոգդանովն ասել է, որ Իրանի ԱԳՆ ղեկավարի եւ նրա տեղակալ Հոսեյն Ջաբերի Անսարի հետ հանդիպումներում կողմերը տեղեկատվություն են փոխանակել Սիրիայի գծով, այդ թվում` թուրքական ղեկավարության հետ Մոսկվայի եւ Թեհրանի ներկայացուցիչների շփումների լույսի ներքո: