Մարիխուանան թաքցրել էր լուցկու տուփի մեջ

ՀԱՍԱՐԱԿՈՒԹՅՈՒՆ 18 Օգոստոս, 2016 16:41

Շիրակի մարզի ընդհանուր իրավասության դատարանում հարուցվել է քրեական գործ՝ ապօրինի կերպով թմրանյութ պահելու դեպքի առթիվ:

Ըստ Դատական տեղեկատվական համակարգի՝ Սերգեյ Հովհաննեսի Մարկոսյանին մեղադրանք է առաջադրվել այն բանի համար, որ 2015թ. աշնանը Գյումրի քաղաքի Ավտոկայան բանավան թաղամասում վայրի աճած կանեփ տեսակի խոտաբույսերից տերեւներ եւ գլխիկներ պոկելով՝ ձեռք է բերել մարիխուանա տեսակի թմրամիջոց, այնուհետեւ այն տարել է իր` Գյումրի քաղաքի Երեւանյան խճուղի 147ա շենքի բակ:

Այն անձամբ գործածելու նպատակով չորացրել, մանրացրել, մի մասը ծխելու եղանակով գործածել է, իսկ մյուս մասը` 1,6 գրամ քաշով մարիխուանա տեսակի թմրամիջոցը պոլիէթիլենային թաղանթի մեջ փաթաթելով` դրել է լուցկու տուփի մեջ եւ ապօրինի պահել իր տաբատի աջ գրպանում` հետագայում ծխելու եղանակով գործածելու համար:

Մարիխուանայի այդ չափաբաժինը հայտնաբերվել եւ վերցվել է 2016թ. մայիսի 31-ին ոստիկանության աշխատակիցների կողմից Գյումրի քաղաքի Մայակովսկի փողոցից նրան` ՀՀ ոստիկանության Գյումրի քաղաքի Կումայրիի բաժին բերման ենթարկելուց հետո: Սերգեյ Մարկոսյանը մեղադրվում է քրեական օրենսգրքի 268-րդ հոդվածի (Թմրամիջոցների կամ հոգեներգործուն նյութերի ապօրինի շրջանառությունն առանց դրանք իրացնելու նպատակի) 1-ին մասի հատկանիշներով:

Այն նախատեսում է առավելագույնը երկու ամիս ժամկետով կալանք կամ առավելագույնը մեկ տարի ժամկետով ազատազրկում: Նրան ստորագրությամբ ազատ են արձակել:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի`օրինական ուժի մեջ մտած դատավճռով:

Քրիստինա Տեր-Մաթեւոսյան