Ադրբեջանում եւս երկու ընդդիմադիր է ձերբակալվել

Ադրբեջանի պետական անվտանգության ծառայությունը օգոստոսի 18-ի գիշերը Բաքվում ձերբակալել է Ադրբեջանի ժողովրդական ճակատ կուսակցության երիտասարդական թեւի առաջնորդ Ֆուադ Ահմեդլիին եւ Բաքվի Սուրախանի շրջանի բաժանմունքի ակտիվիստ Գադիմ Բեքիրովին:

Այս մասին հայտնում է «Թուրան» լրատվական գործակալությունը:

Ֆուադ Ահմեդլիին ձերբակալել են պետանվտանգության ծառայության աշխատակիցները: Նրա տունը խուզարկվել եւ տարվել են մի շարք գրքեր:

Գադիմ Բեքրիովին ձերբակալել են Սուրախանի շրջանի ոստիկանության վարչության աշխատակիցները:

Ադրբեջանում վերջին երեք օրերին ձերբակալվել են երիտասարդական NIDA, REAL շարժումների եւ ընդդիմադիր կազմակերպությունների 9-ն ակտիվիստներ:

Ադրբեջանում սեպտեմբերի 26-ին պետք է հանրաքվե տեղի ունենա սահմանադրության մեջ փոփոխությունների մասին: Ադրբեջանում շատերը վերջին ձերբակալությունների ալիքը համարում են որպես սեպտեմբերյան հանրաքվեից առաջ քաղաքացիական հասարակությանը իշխանությունների կողմից ճնշելու հերթական փորձ: Ձերբակալված բոլոր ակտիվիստները դեմ են արտահայտվել Ալիեւի առանց այն էլ ընդարձակ լիազորություններն ավելի ընդլայնող հանրաքվեին եւ քննադատել կառավարությանը:

Ադրբեջանում վերջին օրերին սկսված նոր բռնաճնշումների ալիքն արժանացել է միջազգային հանրության լուրջ արձագանքին:

Իրավապաշտպան 19 միջազգային կազմակերպությունների կոալիցիան հանդես է եկել համատեղ հայտարարությամբ, որում Ադրբեջանի իշխանությունից պահանջել են դադարեցնել ընդդիմադիրների նկատմամբ բռնաճնշումները եւ ազատ արձակել քաղաքական բանտարկյալներին:

«Ադրբեջանում սահմանադրական փոփոխությունների հետ կապված հանրաքվեին 6 շաբաթ մնացած իշխանությունը նոր բռնաճնշումների ալիք է սկսել: Նպատակը ընդդիմադիր ձայները լռեցնելն է: Կոալիցիայի անդամ կազմակերպությունները պահանջում են լավացնել երկրում մարդու իրավունքների աղետալի վիճակը եւ ազատ արձակել քաղբանտարկյալներին», -ասվում է հայտարարության մեջ:

Կոալիցիայի անդամ կազմակերպություններն են. ARTICLE 19, Canadian Journalists for Free Expression, Civil Rights Defenders, Freedom House, Freedom Now, Helsinki Foundation for Human Rights, Human Rights House Foundation, Index on Censorship, Institute for Reporters’ Freedom and Safety, International Media Support, International Federation for Human Rights (FIDH), International Partnership for Human Rights, Netherlands Helsinki Committee, Norwegian Helsinki Committee, PEN America, PEN International, People in Need, Reporters Without Borders, World Organisation Against Torture (OMCT):

Ադրբեջանում սկսված բռնաճնշումները դատապարտել են ԱՄՆ-ի Պետքարտուղարությունը, Amnesty International-ը, Մարդու իրավունքների տան ցանց միջազգային կազմակերպությունը: