Քննարկվել են Շիրակի մարզում բնապահպանական ոլորտին առնչվող մի շարք խնդիրներ

 ՀՀ բնապահպանության նախարար Արամայիս Գրիգորյանն աշխատանքային այցով եղել է Շիրակի մարզում: Մարզպետ Հովսեփ Սիմոնյանի, մարզպետարանի ստորաբաժանումների  ղեկավարների հետ տեղի ունեցած աշխատանքային քննարկմանն անդրադարձ է եղել տարածաշրջանի բնապահպանական խնդիրներին:

Ինչպես «Արմենպրես»-ին տեղեկացրին ՀՀ բնապահպանության նախարարության տեղեկատվության եւ հասարակայնության հետ կապերի բաժնից, ողջունելով քննարկման մասնակիցներին` Արամայիս Գրիիգորյանը նշել է, որ հանդիպման նպատակը վերջին այցից հետո մարզի համայնքների և մարզպետարանի կողմից առաջ քաշված բնապահանական հարցերի քննարկումն ու դրանց լուծում տալն է:

«Մարզում կան որոշ բնապահպանական խնդիրներ, որոնք կապված էն այստեղ առակա տուֆի հանքերին, որոնցում ռեկուլտիվացիայի աշխատանքներ չեն կատարվել, ինչի վերաբերյալ քննարկումներ են տեղի ունեցել նաև կառավարությունում և կարճ ժամանակ հետո կունենանք  լքված հանքերի ռեկուլտիվացիայի պայմանները և մեխանիզմները: Իսկ գործող հանքերին արդեն օրենքով պարտադրված է հանքշահագործումն ավարտելուց հետո իրականացնել ռեկուլտիվացման աշխատանքներ և այդ նպատակով դրամագլխին համապատասխան փոխանցումներ կատարել: Եթե հանքշահագործողները ինչ-որ հագամանքներում կխուսափեն ռեկուլտիվացիա իրականացնելուց, ապա դրամագլխի միջոցներով այն կիրականացնի ՀՀ բնապահպանության նախարարությունը: Նշեմ, որ մարզում կա նաև լավ օրինակ, երբ անձը սեփականացրել է լքված հանքի տարածքը, ռեկուլտիվացիայի ենթարկել այն, դարձրել հանգստի գոտի, որից օգտվում է ազգաբնակչությունը:

Մարզ կատարած նախորդ այցի ժամանակ բարձրացվել էր նաև «Արփի լիճ›› ազգային պարկի և հարակից համայնքների սահմանների հետ կապված խնդիրներ, որոնք այսօր լուծվել են: Տեղեկացնեմ նաև, որ Ազգային պարկի տարածքների վարձակալությունից առաջացած գումարների 30 տոկոսը ՀՀ բնապահպանության նախարարության նախաձեռնությամբ վերադարձվելու են համայնքների բյուջե` վերջիններիս զարգացման և սոցիալ-տնտեսական խնդիրների լուծման համար»,- նշել է բնապահպանության նախարարը:

Մարզպետ  Հովսեփ Սիմոնյանը ՀՀ բնապահպանության նախարարին առաջարկել է Մանթաշի ջրամբարին /Մանթաշ գետի ջրհավաք ավազանով/ և ՀՀ Շիրակի և Լոռու մարզերի տարածքում գտնվող Ջաջուռի լեռնանցքին տալ հատուկ պահպանվող տարածքների կարգավիճակ: Ջաջուռի լեռնանցքը ունի հարուստ և ինքնատիպ կենսաբազմազանություն, իսկ Մանթաշ գետը և ջրամբարը համարվում են տարածաշրջանի խմելու ջրի հիմնական աղբյուրներից մեկը: Բնապահպանության նախարարը ողջունել է առաջարկը` նշելով, որ նախարարությունը շահագրգռված է ընդլայնել Հայաստանի հատուկ պահպանվող տարածքները և առաջարկել մ արզպետարանի հետ համատեղ աշխատանքային խումբ ձևավորել` սահմանված կարգով առաջարկին ընթացք տալու համար: 

Շիրակի մարզպետարանում ունեցած աշխատանքային քննարկումից հետո Արամայիս Գրիգորյանը մարզպետ Հովսեփ Սիմոնյանի ուղեկցությամբ այցելել է «Գյումրու կանաչ տեխնոլոգիաների կենտրոն»: Կենտրոնի համահիմնադիր Խաչիկ Սահակյանը ներկայացրել է կենտրոնի կողմից միջազգային դրամաշնորհների միջոցով ՀՀ Շիրակի մարզում իրականացրած կանաչ տեխնոլոգիաների ներդրման ծրագրերը: Նախարարը տեղում ծանոթացել է կենտրոնը սնուցող արևային էներգակայանի, արևային եղանակով չրերի ստացման արտադրամասի աշխատանքներին: Արամայիս Գրիգորյանը նշել է, որ ՀՀ բնապահպանության նախ արարությունը մշտապես ողջունել և խրախուսել է կանաչ տեխնոլոգիաների ներդնումը Հայաստանում և պատրաստակամություն հայտնել աջակցել կենտրոնին իր հետագա նախաձեռնություններում:

  ՀՀ բնապահպանության նախարարն այցելել է նաև մարզի տարածքում գտնվող «Արփի լիճ›› ազգային պարկ: Շրջայց կատարել պարկի պահպանվող տարածքներ, տնտեսական գոտիներ, տեղերում ծանոթացել պահպանման աշխատանքներին:  Արամայիս Գրիգորյանը ծաղկեպսակ է դրել և հարգանքի տուրք մատուցել  պարկի վարչական շենքում բացված ԼՂՀ-ում ապրիլյան պատերազմի ժամանակ զոհված հայ զինծառայողների հիշատակն հավերժացնող հուշատախտակի մոտ: Ազգային պարկի վարչական շենքում անցկացված աշխատանքային խորհրդակցության ժամանակ «Արփի լիճ›› ազգային պարկ» ՊՈ ԱԿ-ի տնօրեն Արա Պետրոսյանը ներկայացրել է 2016 թ. առաջին կիսամյակում կատարած աշխատանքները և արձանագրված արդյունքները: Նշվել է, որ հատուկ պահպանության աշխատանքների արդյունավետ իրականացման և լճի հայելին բավարար մակարդակի վրա պահելու շնորհիվ բարենպաստ պայմաններ են ստեղծվել կենսաբազմազանության բարելավման համար: Ավելացել են կենդանկան և բուսական որոշ տեսակների թվաքանակները:

Ներկայացվել է, որ տարեսկզբից ազգային պարկ է այցելել մոտ 600 զբասաշրջիկ, որից 55-ը Ֆրանսիայի Հանրապետությունից: Նախարար Արամայիս Գրիգորյանն շնորհակալություն է հայտնել բոլոր աշխատակիցներին բարեխիղճ և պատասխանատու աշխատանքի համար, ընդգծել ազգային պարկի ստեղծման անհրաժեշտությունն ու կարևորությունը տարածաշրջանի համար: Նախարարն հանձնարարել է պարկի տարածքում էկոզբոսաշրջությունը զարգացնելու համար ակտիվ համագործակցել Հանրապետության զբոսաշրջության ոլորտում գործող կազմակերպությունների հետ, ինչպես նաև զբոսաշրջիկների համար հանգստի ծառաությունները մատուցել` խստագույնս պահպանելով ՀՀ օրենսդրությամբ և իրավական այլ նորմերով սահմանված պահանջները ու չափանիշները: ՀՀ բնապահպանության նախարարը նշել է, որ էկոտուրիզմի զարգացումը, ոչ միայն լրացուցիչ միջոցներ կստեղծի ազգային պարկի պահպանման ծառայություններն ավելի որակյալ և լիարժեք կազմակերպելու համար, այլև կլուծի նաև հարակից համայնքների բնակիչների որոշ սոցիալական հարցերը և կնպաստի ՀՀ Շիրակի մարզում  զբոսաշրջության զարգացմանը:

Արամայիս Գրիգորյանն այցելել է լճի ափին այդ պահին իրենց էկոհանգիստն անցկացնող Շիրակի մարզի երիտասարդների 50 հոգանոց խմբին, ծանոթացել հանգստի պայմաններին, ազգային պարկի կողմից մատուցված ծառայությունների որակին: Երիտասարդները իրենց գոհունակությունն ու շնորհակալությունն են հայտնել տարածաշրջանի այդ գեղեցիկ վայրում լիարժեք հանգիստ կազմակերպելու լավ պայմանների համար: