Երևանում 26-ամյա վարորդը Subaru-ով բախվել է հաստաբուն ծառին. բժիշկները պայքարում են նրա կյանքի համար. ֆոտոռեպորտաժ

Shamshyan.com-ը գրում է.

Այսօր` օգոստոսի 21-ին, խոշոր ավտովթար է տեղի ունեցել Երևանում:

Ժամը 05:00-ի սահմաններում Երևան քաղաքի Ավան վարչական շրջանի Դուրյան թաղամասի բնակիչ, 26-ամյա Արամ Հարությունյանը Սաֆարյան փողոցից դեպի Թամրուչի փողոց տանող խաչմերուկում իր վարած Subaru մակնիշի 34 OZ 016 համարանիշի ավտոմեքենայով դուրս է եկել ճանապարհի երթևեկելի գոտուց և բախվել հաստաբուն ծառին:

Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Ա. Հարությունյանը մարմնական վնասվածքներով տեղափոխվել է Սուրբ Գրիգոր Լուսավորիչ բժշկական կենտրոն:

Դեպքի վայր են ժամանել ճանապարհային ոստիկանության 1-ին սպայական գումարտակի աշխատակիցները՝ Հայաստանի քննչական կոմիտեի Երևանի քննչական վարչության քննիչ Համզոյանի գլխավորությամբ, ում կողմից փաստի առթիվ նյութեր են նախապատրաստվում: Քննիչի հանձնարարականով ավտոմեքենան տեղափոխվել է Երևանի ՃՈ պահպանվող հատուկ տարածք:

Գ. Շամշյանի տեղեկություններով՝ վարորդ Ա. Հարությունյանը աշխատում է Ավան վարչական շրջանի սոցապահովության առողջապահության և ծրագրերի բաժնի առաջատար մասնագետ:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Լուսանկարները՝ Գագիկ Շամշյանի