Թուրքիայում հերթական ահաբեկչական գործողություն է տեղի ունեցել. մեկ զոհ, 4 վիրավոր

Թուրքիայի Ուրֆայի նահանգի Վիրանշեհ քաղաքում այսօր պայթյուն է տեղի ունեցել, որի հետեւանքով մեկ ոստիկան սպանվել, 4-ն էլ վիրավորվել են:

Այս մասին, ինչպես հաղորդում է«Արմենպրես»-ը, հայտնում է «Անատոլու» լրատվական գործակալությունը:

Նշվում է, որ Մարդինում Քրդստանի աշխատավորական կուսակցության (PKK) մարտիկների եւ Թուրքիայի զինված ուժերի միջեւ բախման ժամանակ սպանվել է մեկ զինծառայող:

PKK-ի եւ Թուրքիայի ԶՈւ միջեւ բախում է տեղի ունեցել նաեւ Թունջելիում (Դերսիմ): Սպանվել է մեկ զինծառայող, վիրավորվել` երեք ոստիկան:

«Անատոլու»-ն հաղորդել է, որ Թուրքիայի Այնթապ քաղաքում շաբաթ օրը տեղի ունեցած ահաբեկչական գործողությունն իրագործել է 12-ամյա պատանի մահապարտը (51 զոհ, տուժել են 69 մարդ):

«Պայթյունը կատարվել է 12-14-ամյա պատանու կողմից: Պայթուցիկ սարքը գործողության մեջ է դրել կամ պատանի մահապարտը, կամ այլ անձ», -հաղորդել է գործակալությունը:

Այնթապի նահանգապետ Ալի Երլիքայան տեղի ունեցածը գնահատել է ահաբեկչական գործողություն, քանի որ միջադեպի վայրում անվտանգության մարմինները «մահապարտի գոտու» մասեր են հայտնաբերել:

Թուրքիայի նախագահ Ռեջեփ Թայիփ Էրդողանը հայտարարել է, որ պայթյունի համար, ամենայն հավանականությամբ, պատասխանատու է «Իսլամական պետություն» (ԻՊ) ահաբեկչական կազմակերպությունը:

Ներկա դրությամբ որեւէ ահաբեկչական կազմակերպություն չի ստանձնել Այնթապի պայթյունի պատասխանատվությունը: