Գեղարքունիքի մարզում հավաքվում է հացահատիկի ռեկորդային բերք

 Գեղարքունիքի մարզի երկրագործական տնտեսություններում օգոստոսի առաջին օրերից սկսվել եւ ընթանում է հացահատիկի բերքահավաքը: Հիմնականում այն շարունակվում է բարձր, առանձին տեղերում՝ ռեկորդային արդյունքներով:

Գեղարքունիքի մարզի Վարդենիսի տարածքի տնտեսություններում այսօր դիտարկումներ անցկացրեց  ՀՀ գյուղատնտեսության նախարար Սերգո Կարապետյանը: Աշխատանքային այցի  ընթացքում գյուղնախարարին ուղեկցում էր Գեղարքունիքի մարզպետ Ռաֆիկ Գրիգորյանը: Նախարարի առաջին կանգառը Վարդենիսի ֆերմերային տնտեսության ղեկավար Էդուարդ Նալբանդյանի սերմնաբուծական տնտեսության պահեստավորման կետում էր, ուր արդեն պահեստավորվում է Ռուսաստանի Դաշնությունից ներկրված աշնանացան ցորենի 3 տեսակի բարձրորակ սերմացուներից ստացված բերքը:«Ցանել եմ 200 հեկտար աշնանացան ցորեն՝ «Կրասնոդար», «Յուկա» եւ «Գրոմ»  տեսակի: Մեկ հեկտարի միջին բերքատվությունը կազմել է 50-60 ցենտներ: Դա չափազանց բարձր արդյունք է: Բերքը պահեստավորում ենք՝ ավելի հարմար գներով վաճառելու ակնկալիքով: Միաժամանակ երկրագործական մյուս տնտեսություններին պատրաստ ենք ապահովել բարձրորակ աշնանացան ցորենի սերմնացուով»,-ներկայացրեց Էդուարդ Նալբանդյանը: 

Այնուհետ Սերգո Կարապետյանը ֆերմերային տնտեսությունների ղեկավարների ուղեկցությամբ այցելեց հացահատիկի եւ կարտոֆիլի ցանքատարածություններ, տեղում ծանոթացավ ինչպես հացահատիկի բերքահավաքի ընթացքին, այնպես էլ՝ կարտոֆիլի ցանքերից սպասվող բերքի մոտավոր արդյունքներին: Ինչպես գյուղնախարարին եւ Գեղարքունիքի մարզպետին ներկայացրեց ֆերմերային տնտեսության ղեկավար Աշոտ Գրիգորյանը, նման բերքատվություն մարզի տնտեսությունները չեն ապահովել վերջին 30 տարիների ընթացքում:

«Այս տարի կատարել եմ 100 հեկտար ցանք: Նախորդ տարվա համեմատ 50 տոկոսով ավել է ապահովում հացահատիկի, 100 տոկոսով ավել՝ կարտոֆիլի բերքը: Աշնանացան ցորենի 1 հեկտարի միջին բերքատվությունը մեր տնտեսությունում կազմել է 60-70 ցենտներ, կարտոֆիլի 1 հեկտարից էլ ակնկալում ենք մինչեւ 450-500 ցենտներ բերք»-ներկայացրեց Աշոտ Գրիգորյանը:

Այցի ավարտին նախարար Սերգո կարապետյանը ներկայացրեց իր կանխատեսումները եւ տպավորությունները, Գեղարքունիքի մարզի գյուղատնտեսական ոլորտում արձանագրված վերջին ձեռքբերումները:

«Օգոստոսի 22-ի դրությամբ Գեղարքունիքի մարզում հացահատիկի բերքահավաքն արդեն ավարտվել է մոտ 65 տոկոսով եւ չափազանց բարձր ու գոհացուցիչ  արդյունքներով:Մեկ հեկտարի միջին բերքատվությունը մարզում 40 ցենտներից պակաս չի ստացվում, իսկ առանձին ֆերմերային տնտեսություններում եւ ցանքաշրջանառություն կիրառած հողերում մեկ հեկտարից ստացվում է մինչեւ 70-80 ցենտներ բերք:Չափազանց առատ է նաեւ անասնակերը, որի բերքահավաքը եւս ընթացքի մեջ է՝ ապահովելով բարձր ցուցանիշներ: Նախորդ տարվա համեմատ Գեղարքունիքում 3,6 տոկոսով ավելացել է խոշոր, 4,2 տոկոսով՝ մանր եղջերավոր անասունների գլխաքանակը: Անասնագլխաքանակի աճն ավելի շատ պայմանավորված է ՀՀ կառավարության կողմից իրականացվող «Համայնքների գյուղատնտեսական ռեսուրսների կառավարման եւ մրցունակության ծրագրի» ներդրմամբ, ինչի արդյունքում ջրարբիացվել են տասնյակ հազարավոր հեկտար արոտավայրեր, գյուղատնտեսական նորաստեղծ կոոպերատիվները ապահովվել են գյուղատնտեսական նորագույն տեխնիկաներով: Մինչեւ 2020 թվականը նույն ծրագրում կընդգրկվեն Գեղարքունիքի մարզի նոր համայնքներ: Կշարունակվեն պետական աջակցության զանազան ծրագրերը»,-հավաստեց նախարա ր Սերգո Կարապետյանը:

Խոսրով Խլղաթյան