Երեխաները հեռուստացույցի դիմաց (ֆոտոշարք)

Երեխաներն այնքա՜ն կամակոր են։ Նրանք ուզում են ամեն ինչ հասցնել և միշտ ինչ–որ նոր բան են հորինում։ Նրանք ոգևորված հեծանիվ են վարում, պահմտոցի խաղում, հատակին թափում խաղալիքներն ու ավազից ամրոցներ պատրաստում։ Իսկ ամռանն ընդհանրապես «գործի» պակաս չի զգացվում։

Սակայն մեր սիրելի փոքրիկները մեկ «թշնամի» ունեն, չնայած որ քիչ քանակությամբ և խելամիտ օգտագործելու դեպքում այն կարող է օգուտ բերել։ Բայց երկար ժամանակով վերցնելով հեռուստացույցի հեռակառավարման վահանակը՝ նրանք դառնում են Դոննա Սթիվենսի «Idiot Box» անսովոր ֆոտոնախագծի մասնակիցը։ Այս ֆոտոշարքում այն տղաներն ու աղջիկներն են, ովքեր կախվածություն են ձեռք բերել «զոմբի-արկղից» և կտրվել են իրականությունից։

–Տեխնոլոգիաների այս դարում հեռուստացույցը դարձել է յուրաքանչյուրիս տան բաղկացուցիչ մասը։ Եվ հաճախ, որպեսզի հանգստացնեն իրենց կամակոր երեխային, ծնողները միացնում են «արկղը», փոքրիկին նստեցնում դրա դիմաց և հեռակառավարման վահանակը տալիս ձեռքը։ Առավել փոքր երեխաների համար հեռուստատեսությունն ու ալիքների փոխելը երազ է կոմայի մեջ, որտեղ նրա գլխին են թափվում տրամաբանությունից զուրկ պատկերներ։ Արդյունքում երեխաները դատարկ հայացքներով մնում են էկրանների առաջ կանգնած, որն ավելի շուտ անառողջ պատկեր է հիշեցնում,– իր մտքերով կիսվում է լուսանկարիչն ու բացատրում ֆոտոշարքի անվան պատճառը։

 

Իր ֆոտոշարքում Դոննան ցանկացավ ոչ միայն հանրությանը, այլև ծնողներին ցույց տալ, թե ինչ բացասական հետևանքներ կարող է ունենալ նման դաստիարակությունը։