Արցախում զոհված Արայիկի նորածին քրոջն անվանել են Անի. անունն իր քրոջ համար որոշել էր Արայիկը

News.am-ը գրում է.

Արցախում սեպտեմբերի 2-ին մարտական խնդրի կատարման ժամանակ ծագած այլ հանգամանքներում զոհված Արայիկ Օրդուբեկյանի նորածին քրոջն անվանել են Անի. այս անունն իր քրոջ համար որոշել էր հենց Արայիկը: Այս մասինNEWS.am-ի հետ զրույցում ասաց Օրդուբեկյանների հարեւաններից Քրիստինեն:

Արայիկի մայրը՝ տիկին Ժենյան, գտնվում է Երեւանի «Էրաբունի» հիվանդանոցում, որտեղից մեզ տեղեկացրին, որ երեխայի եւ կնոջ առողջական վիճակը լավ է, սակայն, տիկին Ժենյան հոգեպես շատ վատ վիճակում է եւ անընդհատ բժիշկների հսկողության տակ:

Ավելի վաղ NEWS.am-ը տեղեկացրել էր, որ Արցախում զոհված Արայիկ Օրդուբեկյանի  մայրը սեպտեմբերի 3-ի երեկոյան 8-րդ զավակին է լույս աշխարհ բերել: Զոհված զինծառայողի մորը սեպտեմբերի 3-ին են հաղորդել որդու մահվան մասին եւ միանգամից տեղափոխել հիվանդանոց, որտեղ կեսարյան հատումով ծնվել է նրա 8-րդ երեխան:

Արայիկ Օրդուբեկյանի ընտանիքը մոտ 1 տարի առաջ էր Քաշաթաղ տեղափոխվել Երեւանից, Օրդուբեկյան ամուսինները ունեն 7 երեխա:

Արայիկ Օրդուբեկյանը բանակ էր զորակոչվել 2015թ. ամռանը:

Հիշեցնենք, որ ԼՂՀ Նախագահ Բակո Սահակյանը սեպտեմբերի 3-ին ստորագրել է հրամանագիր, համաձայն որի՝ Լեռնային Ղարաբաղի Հանրապետության պետական սահմանը պաշտպանելիս ցուցաբերած արիության համար ԼՂՀ պաշտպանության բանակի N զորամասի զինծառայող Արայիկ Օրդուբեկյանը հետմահու պարգեւատրվել է «Մարտական ծառայություն» մեդալով։