90-ամյա Հանրային ռադիոյի նոր ծրագրացանկը բավարարելու է բոլոր ունկնդիրներին

Շուրջ ինը տասնամյակ ռադիոընդունիչի միջոցով քաղաքացիների տանը «բնակվող» Հանրային ռադիոն նոր շունչ է ստացել ու սեպտեմբերի 1-ից ռադիոլսողին ներկայացել ինչպես ավանդական, այնպես էլ 2 տասնյակին մոտ նոր ծրագրերով: «Արմենպրես»-ի փոխանցմամբ` սեպտեմբերի 6-ին հայաստանյան մի շարք լրատվամիջոցների ներկայացուցիչնր շրջայց կատարեցին Հանրային ռադիոյի շենքում, հարակից բակում, քայլեցին Պատվո արահետով, ծանոթացան «Մասս Մեդիա» գիտակրթական կենտրոնի գործունեությանը:

Հանրային ռադիոյի 90-ամյակի առիթով ամբողջությամբ վերակառուցվել, լուսավորվել ու կանաչապատվել են ներքին բակը, որտեղ առկա են 10 տեսակի 1370 բույս: Հիմնովին վերանորոգվել են վթարային վիճակում գտնվող շենքի ներքին դիմապատկերը, որոնք ստացել են ռադիոյի խորհրդանիշներով գեղարվեստական ձևավորում: Ռադիոյի շենքի հարակից Ալեք Մանուկյան փողոցում կառուցվել է Պատվո արահետն ու պուրակը:

Սեպտեմբերի 5-ին ՀՀ նախագահի մասնակցությամբ մեկնարկել է թվային հեռարձակումը` ՀՀ ողջ տարածքում: Այսինքն` թվային ազդանշան ընդունող ժամանակակից հեռուստացույցի միջոցով հասանելի կլինի նաև Հանրային ռադիոն:

Հանրային ռադիոյի գործադիր տնօրեն Արման Սաղաթելյանի խոսքով` նոր եթերաշրջանում փորձ են կատարել բավարարել բոլոր ունկնդիրների հետաքրքրությունները: «Մենք հանրային կարծիքի ուսումնասիրման կենտրոնի աջակցությամբ փոքրիկ հետազոտություն անցկացրեցինք, որպեսզի վերանայենք մեր եթերային քաղաքականությունը: Ցանկանում էինք ճշտել` Հանրային ռադիոյից` որպես լրատվամիջոցից, ինչ է ակնկալում հանրությունը: Այստեղ ի հայտ եկան մի շարք բացահայտումներ, որ հանրությունը իր կենսագործունեության համար որոշակի տեղեկատվության խորհրդատվության, պարզաբանուների ստացման կարիք ունի: Դա վերաբերում է տարբեր ոլորտների` սոցիալական, առողջապահական, ֆինանսական, երբ մարդիկ առնչվում են ֆինանսական համակարգի հետ, բայց պատշաճ իրազեկված չեն իրենց իրավունքներից, պարտականություններից: Նոր ծրագրացանկը կոչված է լրացնելու այդ բացը»,-ասաց Արման Սաղաթելյանը: Նրա խոսքով` ծրագրերի զգալի մասը հեռարձակվելու է ուղիղ եթերում, իսկ ունկնդիրը ռադիոկայանի աշխատանքին անմիջապես միանալու, հարց հղելու ու պատասխան ստանալու հնարավորություն է ունենալու:

Իսկ կարծրատիպը, թե ռադիո լսում են միայն միջին ու բարձր տարիքի մարդիկ, Արման Սաղաթելյանը հերքում է` նշելով, որ իրենք փորձել են բավարարել նաև սոցիալապես ակտիվ լսարանի պահանջները:

Անդրադառնալով Ալեք Մանուկյան փողոցում բացված երգող «Եթեր» արձանին, որը նվիրվում է ռադիոյի 90 և հեռուստատեսության 60-ամյակներին` Արման Սաղաթելյանը նկատեց, որ այն գրավիչ կլինի լուսանկարվել սիրող ու հատկապես զբոսաշրջիկների համար: Իսկ արձանին ամրացված ընդունիչից հետագայում հնարավոր է հնչի Հանրային ռադիոյի ուղիղ եթերը: Արձանի հեղինակը Դավիթ Մինասյանն է:

«Մասս Մեդիա» գիտակրթական կենտրոնի կրթական ծրագրերի ղեկավար Անուշ Մարտիրոսյանն էլ ներկայացրեց ուսումնական հաստատության գործունեությունը: «Այն հիմնադրվել է Հայաստանի հեռուստառադիո ընկերության խորհրդի կողմից 2013 թվականին: Կենտրոնի հիմնական նպատակն է պատրաստել որակյալ ու նեղ մասնագիտական կադրեր հեռուստատեսության ու ռադիոյի համար: Արդեն տվել ենք առաջին շրջանավարտները, որոնց գերակշիռ մասն աշխատում է իր մասնագիտությամբ առաջատար հեռուստաընկերություններում, ռադիո ընկերություններում»,- նշեց  Անուշ Մարտիրո սյանը: Նա հայտնեց, որ ներկայում սովորում է շուրջ 60 ուսանող, որոնց դասավանդում են ոլորտի գործող մասնագետները: «Հաշվի առնելով հանգամանքը, որ շրջանավարտները աշխատում են իրենց ընտրած մասնագիտությամբ, մենք արդեն իսկ կատարել ենք մեր առաքելությունը»,-ավելացրեց նա:

Հանրային ռադիոյի 90-ամյակի կապակցությամբ ՀՀ նախագահի կողմից պարգևատրված լրագրող Ռիմա Պետրոսյանը հեռուստատեսությունում ու ռադիոյում աշխատանքի 50-ամյա փորձ ունի: Լրագրողի աշխատանքում կարևորում է անընդհատ կրթվելու, նոր գիտելիքներ, հմտություններ ձեռք բերելու հնարավորությունը: Ռիմա Պետրոսյանը հիմա էլ ակտիվ լրագրող է, ով մի միջոցառումից մյուսն է շտապում և հիմնականում ոտքով: Ապագա լրագրողներին ցանկանում է, որ իրենց գործի նվիրյալը լինեն, ճիշտ ու անաչառ լուսաբանեն իրադարձությունները: «Անթիվ, անհամար հրապարակումներ ունեմ: Բոլոր բ նագավառներին էլ անդրադարձել եմ, բոլորն էլ ժամանակի ընթացքում հոգեհարազատ են դարձել»,-ասաց մեր ավագ գործընկերը` հավելելով, որ մշտապես զգացել է հանրության հարգանքն իր կատարած աշխատանքի նկատմամբ: