Այս տարվա ընթացքում մեր երկիրն արդեն ստացել է շուրջ 10 միլիարդ դրամ պաշտոնական դրամաշնորհ

Փոքր երկրների համար սոցիալ-տնտեսական ծրագրերի իրականացման կարևոր գործոներից են պաշտոնական դրամաշնորները: Այդպիսի երկրների թվին է դասվում աև մեր երկիրը, որտեղ, բացի մասնավոր բազմաթիվ դրամաշնորհներից, որոնք ստանում են տարբեր կազմակերպություններ և անհատներ իրենց ծրագրերի իրականացման համար, նաև մեր երկիր են հոսում բավական շատ պաշտոնական դրամաշնորհներ, որոնց ճիշտ և նպատակային օգտագործումը կհանգեցնի մի շարք հարցերի և խնդիրների կարգավորմանը:

Համաձայն ՀՀ ֆինանսների նախարարության հրապարակած ամփոփ ցուցանիշների` 2016 թվականի առաջին կիսամյակում արտաքին աղբյուրներից ստացվել են ավելի քան 9.8 մլրդ դրամ պաշտոնական դրամաշնորհներ` կազմելով ծրագրով կանխատեսված ցուցանիշի 81.7% ը: Շեղումը պայմանավորված է որոշ նպատակային ծրագրերի կատարման ընթացքով, ինչի հետևանքով չեն ստացվել կամ պակաս են ստացվել դրանց շրջանակներում նախատեսված միջոցները: Ընդհանուր առմամբ նպատակային ծրագրերի շրջանակներում հաշվետու ժամանակահատվածում ստացվել է 7.9 մլրդ դրամ՝ կազմելով ծրագրային ցուցանիշի 65.5% ը: Մասնավորապես՝ 19 նպատակային ծրագրերի շրջանակներում նախատեսված 4.8 մլրդ դրամի չափով միջոցներ չեն ստացվել: Միևնույն ժամանակ, 16 նպատակային ծրագրերի շրջանակներում ստացվել են կիսամյակային ծրագրով նախատեսվածից ավել միջոցներ՝ 6.1 մլրդ դրամ՝ 1.7 մլրդ դրամի փոխարեն, ընդ որում 3.4 մլրդ դրամը տրամադրվել է բյուջեով չնախատեսված ծրագրերի շրջանակներում:

Հաշվետու ժամանակահատվածում պետական բյուջե մուտքագրված դրամաշնորհներից 446.8 մլն դրամը ստացվել է ՀՀ պետական մարմինների արտաբյուջետային ծրագրերի շրջանակներում, որը կազմել է կանխատեսված ցուցանիշի 52.1%-ը: Մյուս նպատակային ծրագրերի շրջանակներում ստացվել է կանխատեսված միջոցների 66.5% ը` ավելի քան 7.4 մլրդ դրամ, որից 3.3 մլրդ դրամը տրամադրվել է Եվրոպական միության հարևանության ներդրումային ծրագրի աջակցությամբ իրականացվող ծրագրերի շրջանակներում՝ նախատեսված 862.9 մլն դրամի դիմաց: 1.3 մլրդ դրամ է ստացվել Գլոբալ հիմնադրամի աջակցությամբ իրականացվող ծրագրերի շրջանակներում՝ կազմելով նախատեսվածի 117.4%-ը, 1.4 մլրդ դրամ (նախատեսվածի 113.3%-ը)՝ Համաշխարհային բանկի, 597.4 մլն դրամ (նախատեսվածի 20.4% ը)` Ռուսաստանի Դաշնության, 301.1 մլն դրամ (նախատեսվածի 28.7%-ը)` Գերմանիայի զարգացման վարկերի բանկի, 97 մլն դրամ (նախատեսվածի 94%-ը)՝ Գյուղատնտեսության զարգացման միջազգային հիմնադրամի, 52.6 մլն դրամ (նախատեսվածի 93.2%-ը)` ԱՄՆ կառավարության, 119.6 մլն դրամ (նախատեսվածի 41.8%-ը)՝ Վերակառուցման և զարգացման եվրոպական բանկի, 36.2 մլն դրամ (նախատեսվածի 43.9%-ը)՝ ԱՄՆ հիվանդությունների կանխարգելման և վերահսկման կենտրոնի, 298.6 մլն դրամ (նախատեսվածի 44%-ը)՝ Դանիական Թագավորության, 7.2 մլն դրամ (նախատեսվածի 32.1%-ը)՝ ՄԱԿ-ի ՇՄ ծրագրի և Դանիական տեխնիկական համալսարանի համագործակցության կենտրոնի աջակցությամբ իրականացվող ծրագրերի շրջանակներում: Հաշվետու ժամանակահատվածում չեն ստացվել Եվրոպական միության, Եվրոպական ներդրումային բանկի, Նիդեռլանդների կառավարության, Գլոբալ էկոլոգիական հիմնադրամի և Իրանի Իսլամական Հանրապետության կողմից նախատեսված նպատակային դրամաշնորհները՝ 2.8 մլրդ դրամ ընդհանուր գումարով:

Շուրջ 2.0 մլրդ դրամ է ստացվել Եվրոպական հարևանության շրջանակներում ՀՀ-ԵՄ գործողությունների ծրագրով նախատեսված՝ «Մասնագիտական կրթության և ուսուցման (ՄԿՈՒ) բարեփոխման շարունակություն և զբաղվածության հայեցակարգի մշակում» 2009 թվականի ֆինանսավորման համաձայնագրի 4-րդ հատկացման գծով, որը նախատեսված է եղել ՀՀ 2015 թվականի պետական բյուջեով, սակայն 2015 թվականին չի ստացվել:

Նախորդ տարվա նույն ժամանակահատվածի համեմատ ՀՀ պետական բյուջե մուտքագրված պաշտոնական դրամաշնորհներն աճել են 2.4 անգամ կամ 5.7 մլրդ դրամով: